Տեսանյութեր
Լուսանկարներ
Ճանապարհների սպասարկումը կհսկվի առցանց համակարգով
Հայաստանի տրանսպորտի, կապի և տեղեկատվական տեխնոլոգիաների նախարարությունը վերահսկողության նոր մեխանիզմ է գործարկել:
Ավելացել է ճանապարհաշինական կազմակերպությունների աշխատանքի առցանց հսկողության մեխանիզմը. կապալառուների մեքենաների վրա տեղադրվել են թրեյքերներ, իսկ «Հայավտոճան» ՊՈԱԿ-ում ներդրվել է համապատասխան տեղեկատվական համակարգ, որով առցանց հնարավոր է 24 ժամ հետևել՝ արդյոք կոնկրետ համարանիշով մեքենան աշխատում է, թե կանգնած է, որ կետից է սկսել ճանապարհը մաքրել և ուր է հասել:
Ինչպես տեղեկացնում է նախարարությունը` մինչև այժմ ճանապարհաշինական կազմակերպությունների աշխատանքը վերահսկվում էր «Հայավտոճան» ՊՈԱԿ-ի ճանապարհների շահագործման և պահպանման բաժնի աշխատակիցների միջոցով: Իրականացվում էին ստուգողական այցեր կամ հեռախոսազանգեր:
Ներկայում «GPS» սարքավորումներով համալրված են Աբովյանի, Հրազդանի, Չարենցավանի և Սևանի տարածաշրջանների ճանապարհաշինական կազմակերպությունների ձյուն մաքրող և աղցան մեքենաները:
Նախարարությունը հայտնում է, որ շուտով համակարգին կմիանա հանրապետական և միջպետական նշանակության ճանապարհներն սպասարկող բոլոր ճանշինների տեխնիկան:
Մեկնաբանել