Կառավարության այսօրվա նիստի օրակարգում չքննարկվող կարգով ընդգրկված էր «Երևանի օլիմպիական մանկապատանեկան համալիր մարզադպրոց» ՊՈԱԿ ստեղծելու հարցը։ Այն առանց առարկությունների ընդունվեց կառավարության անդամների կողմից։

Համաձայն կառավարությանը ներկայացված որոշման նախագծի՝ ՊՈԱԿ-ի գործունեության առարկան լինելու է մարզական աշխատանքների և ֆիզիկական դաստիարակության համապատասխան ուսումնական ծրագրերի պահանջների իրականացումը, իսկ նպատակները՝ ֆիզիկական կուլտուրայի և սպորտի միջոցով պարապողների առողջության պահպանումն ու ամրապնդումը, պարապողների մարզական ունակությունների կատարելագործումը և Հայաստանի Հանրապետության ազգային հավաքականի թիմերի համար հերթափոխի պատրաստումը։

Բացի այդ, «Երևանի օլիմպիական մանկապատանեկան համալիր մարզադպրոց» ՊՈԱԿ-ը կարող է իրականացնել լրացուցիչ մանկավարժական, ֆիզկուլտուրային-առողջարարական ծրագրեր։

««Երևանի օլիմպիական մանկապատանեկան համալիր մարզադպրոց» պետական ոչ առևտրային կազմակերպության ստեղծումը հնարավորություն կտա նպաստելու համալիր մարզաձևերի զարգացմանն ու հանրայնացմանը, ինչպես նաև համակարգելու համալիր մարզաձևերի մանկապատանեկան մարզադպրոցի աշխատանքները և արդյունավետ օգտագործելու բյուջետային հատկացումները»,- նշված է որոշման նախագծում։

«Երևանի օլիմպիական մանկապատանեկան համալիր մարզադպրոց» ՊՈԱԿ-ի ստեղծմանը հաջորդող քայլերից է բյուջետային հայտում Հայաստանի ազգային օլիմպիական կոմիտեի (այսուհետ՝ ՀԱՕԿ) ըմբշամարտի օլիմպիական հերթափոխի մասնագիտացված սպորտդպրոց-հիմնարկին հատկացվելիք 35 միլիոն դրամ գումարը 2017 թվականի հունվարի 1-ից նախատեսել որպես «Երևանի օլիմպիական մանկապատանեկան համալիր մարզադպրոց» ՊՈԱԿ-ի ֆինանսական միջոցներ:

Այսինքն՝ «Երևանի օլիմպիական մանկապատանեկան համալիր մարզադպրոց» ՊՈԱԿ-ի բյուջեն կձևավորվի ՀԱՕԿ-ի ըմբշամարտի օլիմպիական հերթափոխի մասնագիտացված սպորտդպրոց-հիմնարկին պետական բյուջեով նախատեսված ֆինանսական միջոցներից՝ լրացուցիչ ֆինանսական հետևանքներ չառաջացնելով, միաժամանակ նպաստելով մարզաձևերի զարգացումը և մասսայականացումը կենտրոնացված կերպով իրականացնելուն:

Ինչպես ներկայացված է որոշման նախագծում՝ «Երևանի օլիմպիական մանկապատանեկան համալիր մարզադպրոց»-ի ստեղծումը կնպաստի հանրապետության ողջ տարածքում մարզաձևերի զարգացմանը, մասսայականացմանը, պետական միջոցներով տարածքում երեխաների և երիտասարդության առողջության պահպանմանն ու ամրապնդմանը, պարապողների թվի ընդլայնմանը, ընտրած մարզաձևում պարապողների մարզական վարպետության կատարելագործմանը, Հայաստանի Հանրապետության հավաքական թիմերի համար հերթափոխի պատրաստմանը, երեխաների հանգստի ու ժամանցի կազմակերպմանը, արդյունավետ պայմանների ապահովմանը: