Գայանե Սարգսյան

2016թ. երրորդ եռամսյակում Լոռու մարզպետարանի վարչական հսկողություն իրականացնող հանձնաժողովը մարզի Չկալով համայնքում իրականացրած ստուգման ընթացքում մի շարք խախտումներ է արձանագրել: Համայնքի ավագանին չի պահպանել օրենքով սահմանված գործառույթների մի մասը: Մասնավորապես` «Տեղական ինքնակառավարման մասին» ՀՀ օրենքի 11-րդ հոդվածի 2-րդ մասի պահանջը, ըստ որի` ավագանու նիստերը պետք է անցկացվեն ոչ պակաս, քան երկու ամիսը մեկ անգամ:

«Մի անգամ է եղել, որ երկու ամիսն անցել է, դրա համար նույնիսկ քարտուղարը գրավոր նկատողություն է ստացել»,- մեզ հետ հեռախոսազրույցում նշեց համայնքապետ Ռոման Շաքարյանը, ապա դիմեց կողքին գտնվող աշխատակազմի քարտուղարին՝ բաց թողնված ժամկետը ճշտելու համար: Վերջինիս հուշումից հետո համայնքապետը շտկեց՝ չէ, երկամսյա ժամկետը չենք խախտել, նկատողությունն էլ այլ բացթողման համար է եղել:

Համայնքային իշխանությունները չեն պահպանել «Տեղական ինքնակառավարման մասին» ՀՀ օրենքի 12- րդ հոդվածի պահանջը, ըստ որի` համայնքի ղեկավարը պարտավոր էր ավագանու հերթական նիստից առնվազն յոթ օր առաջ  հրապարակել տեղեկություն՝ ավագանու նիստի ժամանակի, վայրի և օրակարգի վերաբերյալ:

 Արձանագրված այս խախտման վերաբերյալ համայնքապետի տեսակետը միանշանակ չէ: Վերջինս նախ նշում է՝ շտկումներն արդեն արել ենք, արդեն սահմանված կարգով ենք անում: Ճշգրտող հարցին՝ մինչև հիմա չէի՞ք հրապարակում ոչ մի տեղ, պատասխանում է. «Միշտ էլ հրապարակվել է: Դե, եթե արձանագրությունում եղել է, ուրեմն մի անգամ ինչ-որ բացթողում է եղել, էլի»:

Ապա կասկածանքով հարցնում է՝ կարո՞ղ է դուք մերը չեք նայում, որովհետև ես մի քիչ անակնկալի եմ գալիս, էլի:

Հավաստիացնում եմ, որ ձեռքիս տակ հենց Չկալովին վերաբերող փաստաթղթերն են:Ռ. Շաքարյանը նախընտրում է հեռախոսը փոխանցել աշխատակազմի քարտուղարին` դա հիմնավորելով այսպես՝ ինքն ա գրողը, ինքն ավելի համոզված կասի:

Աշխատակազմի քարտուղարը Անի Ավետիքյանն է: Վերջինս ևս բացառում է ավագանու նիստերի անցկացման երկամսյա ժամկետի խախտումը:

«Երկու ամիսը չի խախտվել, ուղղակի փաստաթղթերն են ուշ առաքվել մարզպետարան, որի համար նկատողություն ենք ստացել»,- պնդում է  աշխատակազմի քարտուղարը:

Ինչ վերաբերում է ավագանու նիստի մասին հրապարակային տեղեկացմանը, նշում է. «Հիմա արդեն տեղեկացնում ենք, ավագանու նիստից յոթ օր առաջ ավագանուն տեղյակ ենք պահում, որ նիստը պետք է կայանա»:

Նկատում եմ, որ տեղյակ պետք է պահել ոչ միայն ավագանու անդամներին, այլ նաև բնակիչներին:

«Պլակատների ցուցանակ ունենք գյուղապետարանում, որտեղ կախվում է ավագանու նիստի օրակարգը»,- ասում է աշխատակազմի քարտուղարը:

Համայնքում չի պահպանվել նաև «Տեղական ինքնակառավարման մասին» ՀՀ օրենքի 16-րդ հոդվածի 1-ին մասի 27-րդ կետի, 37-րդ հոդվածի 1-ին մասի 1-ին կետի, «Քաղաքաշինության մասին» ՀՀ օրենքի 14-րդ հոդվածի 26- րդ կետի պահանջները, ըստ որի` համայնքի ավագանին պետք է ընդուներ համապատասխան որոշումներ համայնքի քաղաքաշինական ծրագրային փաստաթղթերը, դրանց փոփոխությունները, ինչպես նաև նախագծման առաջադրանքները «Քաղաքաշինության մասին» ՀՀ օրենքով սահմանված կարգով հաստատելու վերաբերյալ:

Խախտվել է նաեւ «Տեղական ինքնակառավարման մասին» ՀՀ օրենքի 32-րդ հոդվածի 1-ին մասի 1.1- կետի պահանջը` համաձայն որի համայնքի ղեկավարը անհատական ակտեր ընդունելուց հետո պարտավոր է երկօրյա ժամկետում այն ուղարկել համայնքի ավագանու անդամներին և փակցնել համայնքի ավագանու նստավայրում` բոլորի համար տեսանելի տեղում:

 Համայնքի տեղական ինքնակառավարմանն առնչվող և  կարևորագույն այլ հարցերի առնչությամբ (համայնքի տարեկան բյուջե, համայնքի կողմից մատուցվող հանրային ծառայությունների ոլորտներում համայնքի ավագանու և ղեկավարի որոշումներ, համայնքի գլխավոր հատակագիծ, քաղաքաշինական, բնապահպանական հարցեր) հանրային լսումներ ու քննարկումներ ոչ միշտ են անցկացվել, ինչի արդյունքում չի պահպանվել ՏԻՄՏ օրենքի 33.1-րդ հոդվածի, 1-ին մասի 3-րդ կետի պահանջը:

«2017թ. բյուջեի հանրային քննարկումն արել ենք,- ասում է աշխատակազմի քարտուղարը, ապա վստահեցնում,- մինչև հիմա էլ ենք անցկացրել, ուղղակի թուղթը չի պահպանվել որպես փաստաթուղթ: Այսինքն՝ բնակիչների հետ քննարկում եղել է, բայց փաստաթուղթ չենք պահպանել»:

Հարցին՝ ինչպե՞ս են իրազեկել բնակիչներին հանրային քննարկման մասին, Ա. Ավետիքյանը պատասխանում է՝ գյուղամիջում հավաքված են եղել, ասել ենք, ում հետաքրքրել է, եկել է, ում չէ՝ չէ:

Վերջինիս խոսքով` բնակիչների մասնակցությունն անցկացված հանրային քննարկումներին սահմանափակվել է ֆիզիկական ներկայություն ապահովելով, նրանք երբևէ հանդես չեն եկել որևէ հարցով ու առաջարկով: Մասնակիցների առավելագույն թիվն էլ եղել է 10-15 բնակիչ:

Չկալովում բացթողումներ են արձանագրվել նաև համայնքի ղեկավարի կողմից հաստատված ֆինանսական փաստաթղթերում: Որոշ դեպքերում գնված ապրանքանյութական արժեքների ծախսերը հիմնավորող փաստաթղթերը լրացված են եղել թերություններով:

Չի պահպանվել ՀՀ կառավարության 29.12.2005թ. N 2335-Ն որոշմամբ հաստատված կարգի 9-րդ կետի պահանջը, համաձայն որի` գործուղվող աշխատողին գործուղման ծախսերի հատուցումը տրվում է գործուղում մեկնելուց առնվազն մեկ օր առաջ:

 Համայնքի ղեկավարը չի պահպանել նաև Գնումների մասին օրենքի դրույթները, ըստ որի` մինչև յուրաքանչյուր տարվա փետրվարի 1-ը համայնքի ղեկավարը հաստատում է գնումների պլանը և յոթ աշխատանքային օրվա ընթացքում սահմանված կարգով հրապարակում է www.gnumner.am կայքում:

Վարչական հսկողության իրականացումից հետո հայտնաբերված խախտումները ներկայացվել են համայնքի ավագանու նիստի ընթացքում, որից հետո ավագանին դիմել է համայնքի ղեկավարին՝ արձանագրված թերություններն ու բացթողումները վերացնելու և ավելի ուշ՝ Լոռու մարզպետին ու համայնքի ավագանուն ձեռնարկված քայլերի մասին տեղեկացնելու համար:

«Աշխատում ենք ակտի բոլոր խախտումները ճշտելով գնանք»,- զրույցի ավարտին վստահեցնում է աշխատակազմի քարտուղարը: