HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Վահե Սարուխանյան

«Զվարթնոցում» կտրուկ աճել է տեղափոխվող ուղեւորների ու բեռի քանակը (ինֆոգրաֆիկա)

Նախորդ հոդվածում ամփոփել էինք Գյումրու «Շիրակ» օդանավակայանի արտադրական ցուցանիշները նախորդ 3 տարիների կտրվածքով: Պարզվել էր, որ 2016-ին «Շիրակում» կտրուկ անկում էր գրանցվել բոլոր սեկտորներում (թռիչքներ, բեռնափոխադրում, ուղեւորահոսք): Պատճառն այն էր, որ անցյալ տարի միայն մեկ ամիս է եղել, երբ Հայաստանի մեծությամբ երկրորդ օդանավակայանում թռիչք-վայրէջքների թիվը գերազանցել է 10-ը, նույնիսկ երկու ամիս ընդհանրապես չվերթներ չեն եղել: Չնայած սրան՝ տարեվերջին որոշ աշխուժություն է սկսվել:

Հիմա անդրադառնանք երկրի գլխավոր օդային դարպասին՝ Երեւանի «Զվարթնոցին»: Այստեղ ուրախանալու առիթ կա՝ ի տարբերություն «Շիրակի»:

Նախ ասենք, որ նախորդ տարի թռիչք-վայրէջքները «Զվարթնոցում» աճել են 2015-ի համեմատ: Սակայն ինֆոգրաֆիկան ցույց է տալիս, որ անցյալ տարվա առաջին կեսն այնքան էլ հաջող չէր մայր օդանավակայանի համար: Այդուհանդերձ, հուլիսին՝ ամառային տուրիստական սեզոնի ընթացքում, թռիչքների թիվն աճել է ու օգոստոսին հասել գագաթնակետին: Սեպտեմբեր-դեկտեմբերին էլ «Զվարթնոցում» ավելի շատ չվերթներ են եղել, քան 2014-ի նույն ամիսներին:    

Flights: Zvartnots (2014-2016)
Create line charts

2014-ը շեշտում ենք, որովհետեւ այդ տարին ընդհանուր կտրվածքով իսկապես հաջող էր: Եթե 2016-ին գրանցվել է ավելի շատ չվերթ (9266), քան 2015-ին (9012), ապա միեւնույնն է՝ չի հաջողվել կրկնել 2014-ի ցուցանիշը, երբ գրանցվել էր ավելի քան 10 հազար թռիչք-վայրէջք՝ 10409 հատ:

Zvartnots' flights (2014-2016)
Create pie charts

2016-ը նախորդ երկու տարիներից տարբերվում է հատկապես բեռնափոխադրման ցուցանիշով (առաքված ու ներմուծված բեռների ընդհանուր քաշը տոննայով): Տարվա սկզբից բեռնափոխադրման ծավալները «Զվարնթոցում» աճել են: Լավագույն արդյունքը եղել է նոյեմբերին, երբ տեղափոխվել է 2558 տ բեռ (շեշտենք, որ այս թիվը չի ներառում ուղեւորների բեռները):

Cargo (t): Zvartnots (2014-2016)
Create line charts

Արդյունքում բեռնափոխադրումը նախորդ տարիների համեմատ 2016-ին կտրուկ աճել է: Եթե 2014-2015 թթ. փոխադրվել է 10 հազար տոննայից մի փոքր շատ բեռ, ապա անցյալ տարի այդ թիվն անցել է 18 հազարը:

Zvartnots' cargo (t) (2014-2016)
Create your own infographics

2014-ին արձանագրված թռիչքների մեծ քանակը բերել էր նրան, որ այդ տարի ուղեւորահոսքը (ժամանած եւ մեկնած ուղեւորների ընդհանուր թիվը) հատել էր 2 մլն մարդու շեմը: 2016-ն այս առումով վատ չէր մեկնարկել. հունվար-մարտ ամիսների ցուցանիշները գերազանցում էին 2014-2015-ի նույն ժամանակահատվածի թվերը, սակայն ապրիլ-օգոստոս ամիսներին չստացվեց գերազանցել կամ կրկնել 2014-ի արդյունքները: Այդուհանդերձ, տուրիստների հոսքը սեպտեմբեր-դեկտեմբերին տվեց իր դրական արդյունքը: Ըստ էության, նշանակալի դեր է խաղացել հատկապես իրանցի ու ռուսաստանցի զբոսաշրջիկների մուտք-ելքը: Եթե տարվա մեծ մասում, հատկապես ամռանը, նկատելի է իրանցիների առկայությունը, ապա աշնանից սկսած, ձմեռային տուրիզմով պայմանավորված, 2016-ին զգալի էր ռուսալեզու տուրիստների հոսքը:

Passengers: Zvartnots (2014-2016)
Create line charts

Տարեկան կտրվածքով չնայած թռիչք-վայրէջքներն ավելի քիչ էին 2014-ի համեմատ, ուղեւորների թիվը գերազանցել է այդ տարվա արդյունքը: 2014-ի 2 մլն 45 հազար ուղեւորի դիմաց անցյալ տարի «Զվարթնոցով» տեղափոխվել է 2 մլն 105 հազար մարդ: Քաղավիացիայի գլխավոր վարչության փոխանցմամբ՝ սա 1992-ից հետո լավագույն արդյունքն է:

Zvartnots' passengers (2014-2016)
Create your own infographics

Համեմատաբար քիչ թռիչքների պարագայում ավելի շատ մարդկանց տեղափոխումը նշանակում է, որ կամ օդանավերն ավելի տարողունակ են եղել, կամ դրանք թռել են ավելի ծանրաբեռնված, կամ էլ՝ երկուսը միասին:

Լուսանկարը՝ Արմեն Գասպարյանի

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter