Գայանե Սարգսյան

2016թ.-ին  կազմակերպությունների, քաղաքացիերի ու լրատվամիջոցների կողմից  Լոռու մարզպետարանում ստացվել է թվով 3483 դիմում, բողոք, առաջարկություն և տեղեկատվության հարցում, որը 2015թ.-ի համեմատ ավել է 1056-ով:

Լոռու մարզպետարանի քարտուղարության բաժնի պետ Սամվել Մակասյանի խոսքով՝ ավելացել է հատկապես մարզի տարածքում գործող այլ կառույցների աշխատակիցների աշխատանքից դժգոհողների և սոցիալական աջակցության հարցերով դիմողների թիվը:

«Բողոքողների մի զգալի մասն աղետի գոտու այն բնակիչերն են, որոնք դժգոհում են իրենց  բնակարանները չկառուցելու կամ կիսավարտ թողնելու պատճառով»,- նշում է Ս. Մակարյանը:

Բնակիչները բողոքներ են ներկայացրել նաև բժշկա-սոցիալ փորձաքննական հանձնաժողովների աշխատանքի, պետեկամուտների կոմիտեի կողմից իրականացված ստուգումների,  ընտանեկան նպաստի համակարգում չընդգրկվելու կամ բանկում ներդրած ավանդի ետ վերադարձման առնչությամբ:

Բողոքների ցանկում անմասն չեն մնացել նաև համայնքապետարանները. համայնքապետերի ու  աշխատակազմերի աշխատանքի հետ կապված դժգոհությունները ևս հասել են Լոռու մարզպետին:

Քարտուղարության բաժնի պետի խոսքով, բողոքների գերակշիռ մասը  Թումանյանի ու Սպիտակի տարածաշրջաններից է, դժգոհություներ կան նաև  մարզկենտրոն Վանաձորից:

Ինչ վերաբերում է մարզպետին ուղղված դիմումներին, աճել է հատկապես սոցիալական աջակցության խնդրանքով դիմողների թիվը: Սա, Ս. Մակարյանի դիտարկմամբ, պայմանավորված է  բնակչության սոցիալական վիճակի վատթարացմամբ:

Բաժինն ստացել է նաև առաջարկություններ մարզի մի քանի կազմակերպությունների  կողմից, որոնք հիմնականում վերաբերել են այլ աղբյուրներից միջոցների ներգրավմամբ արտադրության ծավալների վերականգնմանը, ընդլայնմանն ու նոր աշխատատեղերի ստեղծմանը:

Բաժնի պետն այս առումով մատնանշում է դրանից երկուսը՝ «Գլորիա» կարի ֆաբրիկան և պահածոների արտադրությամբ զբաղվող «Ռոզֆրուդ» ընկերությունը:

Անհատ քաղաքացիների կողմից առաջարկություններն անհամեմատ քիչ են: Վարդաբլուրցի մի բնակիչ, օրինակ,  հանդես է եկել գյուղում Մեծ եղեռնի զոհերի հիշատակին հուշարձան կառուցելու առաջարկով: