Ինչպես հայտնում է Տրանսպորտի, կապի և տեղեկատվական տեխնոլոգիաների
նախարարության լրատվական ծառայությունը, նիստին ներկա էին աշխատանքային խմբում ընդգրկված մի շարք հասարակական կազմակերպությունների ներկայացուցիչներ, այդ թվում՝ «Ավտովարորդների պաշտպանության լիգա» ՀԿ  նախագահ Տիգրան Հովհաննիսյանը, Հայաստանի տաքսի ծառայությունների գործատուների ճյուղային միության նախագահ Վահագն Սահակյանը, «Հայաստանի սպառողների միություն» ՀԿ նախագահ Արմեն Պողոսյանը, «Աքիլես» ավտովարորդների իրավունքների պաշտպանության կենտրոն ՀԿ նախագահ էդուարդ Հովհաննիսյանը։

Նիստին մասնակցում էին նաև Հայաստանի ավտոապահովագրողների բյուրոյի գործադիր տնօրեն Վահան Ավետիսյանը, նախարարության համապատասխան վարչությունների մասնագետներ։

Քննարկվող հարցերը հիմնականում վերաբերել են մարդատար տաքսի ավտոմոբիլներով ուղևորափոխադրումների ոլորտը կարգավորող օրենսդրական և ենթաօրենսդրական ակտերում փոփոխություններ կատարելուն։ 

Ներկայացված առաջարկներն առավելապես ուղղված էին հավասար մրցակցային պայմաններ սահմանելուն, մատուցվող ծառայությունների որակը բարձրացնելուն։

«Ավտովարորդների իրավունքների պաշտպանության լիգա» ՀԿ-ի նախագահ Տիգրան Հովհաննիսյանն ընդգծել է, որ ուղևորափոխադրում իրականացնող բոլոր մեքենաների նկատմամբ պետք է լիցենզավորման հավասար պայմաններ ստեղծվեն. երթակարգավարական և տաքսի ծառայությունները պետք է լիցենզավորվեն։  «Աջակցություն տաքսի սերվիսներին» ՀԿ նախագահ Արամ Թամազյանն էլ հավելել է, որ անպայման պետք է տարանջատում լինի տաքսի ծառայություններ մատուցող ընկերությունների և անհատ տաքսիների միջև։

«Աքիլես» ավտովարորդների պաշտպանության կենտրոն ՀԿ նախագահ էդուարդ Հովհաննիսյանն էլ առաջարկել է սահմանել ուղևորափոխադրումների մատուցման կարգ, որով կկանոնակարգվի ուղևոր-վարորդ փոխհարաբերությունները։

Հայաստանի տաքսի ծառայությունների գործատուների ճյուղային միության նախագահ Վահագն Սահակյանն անդրադարձել է մեքենաների տեխնիկական զննության կարգին։ Նա ցանկացավ տեղեկանալ, թե ինչքանո՞վ են հաշվի առնվել նախորդ նիստի ընթացքում այդ խնդրի վերաբերյալ ներկայացված իրենց առաջարկությունները։

Նախարարության տրանսպորտի վարչության պետի տեղակալ Դավիթ Մելքոնյանը մանրամասնել է, որ բոլոր առաջարկները հաշվի են առնվել, և հաջորդ շաբաթ արդեն նախագիծը կուղարկվի աշխատանքային խմբի բոլոր անդամներին։

Նիստի ընթացքում անդրադարձ է կատարվել նաև ավտոկայանների կառավարման խնդրին։ «Ավտովարորդների պաշտպանության լիգա» ՀԿ նախագահ Տիգրան Հովհաննիսյանն ընդգծել է իրենց կազմակերպության կողմից այն արդյունավետ կառավարելու հնարավորությունը։ Նրան առաջարկվել է ներկայացնել ավտոկայանների կառավարման իրենց մոդելը, որը կդրվի քննարկման։

Նիստի ավարտին աշխատանքային խմբի ղեկավար, նախարարության լիզենզավորման գործակալության պետ Աշոտ Սահակյանը նշել է, որ աշխատանքային խմբի բոլոր առաջարկները կարձանագրվեն և եզրակացությունը կներկայացվի նախարարին։