Այսօրվա մամուլի ասուլիսում լրագրողները Հանրապետական կուսակցության փոխնախագահ Ռազմիկ Զոհրաբյանին հարցեր ուղղեցին նոյեմբերի 30-ին Ազգային ժողովում տեղի ունեցած միջադեպի վերաբերյալ. այդ օրվա նիստում ՀՀԿ-ական պատգամավոր Առաքել Մովսիսյանը (մականունը՝  Շմայս) «հայվան» էր անվանել «Ժառանգության» պատգամավոր Արմեն Մարտիրոսյանին: Ռազմիկ Զոհրաբյանին հարցեր ուղղվեցին նաև Սյունիքի ՀՀԿ-ական մարզպետ Սուրիկ Խաչատրյանի (մականունը՝ Լիսկա) կողմից գործարար Սիլվա Համբարձումյանի ծեծվելու վերաբերյալ: Ստորև ներկայացվում է ասուլիսի այդ մասը:

-Մեկնաբանեք նախորդ օրվա միջադեպը, որ տեղի ունեցավ խորհրդարանում: Երևի հիշում եք:

-Այո, իհարկե, ես հենց էնտեղ եմ եղել, մասնակից եմ եղել նիստին: Աշխարհի բոլոր պառլամենտներում էլ էսպես էկզոտիկ բաներ լինում են, և կարծում եմ՝ ամենաքիչը հենց մեզ մոտ են լինում: Տեսել եք հեռուստատեսությամբ Ճապոնիայի պառլամենտում, անգլիական պառլամենտում: Ճիշտ է, ասենք, տերմինների ընտրության հարցում հարկավոր է զուսպ լինել, ես համաձայն եմ դրան:

-Այսինքն՝ հուսանք նման էկզոտիկ տեսարաններ առաջիկայում քի՞չ կտեսնենք:

-Այսինքն՝ ավելի շատ գուրգուրանքի արժանի տերմիններ լինեն, քան թե նախատական:

-Եթե նկատողություն չանեն, վաղը Կորեա կամ Ճապոնիա կլինի Ազգային ժողովը. իրար կծեծեն:

-Չէ, էդպիսի բան չկա: Ինչպես նկատել եք, նախկին խորհրդարանում մի քանի դեպք եղել է, որ իրար խփել են, բայց մեր խորհրդարանում այս 4 տարվա մեջ կարծես թե ծեծ չի եղել: Ընդամենը էդ տերմիններն էլ էսօր բացատրեցի: Մեկը «հայվան» է ասել, մյուսը հակադարձել է չգիտեմինչ:

-«Էշ» էլ են ասել, պարոն Զոհրաբյան:

-«Է՞շ»: Դե, «հայվանի» նման էլ՝ էդ «էշը»: «Հայվանը» թուրքերեն նշանակում է անասուն: Դե, «էշն» էլ է անասուն, էլի: Ես կատակի եմ վերածում, որովհետև իսկապես դա էդպես մեծ խնդիր չի: Բայց պետք է զուսպ լինել, և ես դրա կողմնակիցն եմ:

-Քիչ առաջ դուք ասացիք, որ ալկոհոլիկներին և թմրամոլներին ձեր կուսակցության շարքերում չեք հանդուրժում և չեք ընդունում: Իսկ կանանց նկատմամբ բռնություններ գործադրողներին հանդուրժո՞ւմ եք:

-Հանրապետական կուսակցությունը ունի կին կուսակցականների մեծ բանակ: Թիվը հիմա ես կոնկրետ չասեմ, բայց երևի մի 50-60 հազարի սահմաններում է: Եվ կանանց նկատմամբ իմ, բնականաբար, վերաբերմունքը շատ նորմալ է, գիտենք՝ կնոջ հետ ինչպես պետք է վարվել: Իսկ եթե դուք էդ հարցը շարունակելու եք տանեք մի ուղղությամբ, խնդրեմ ասեք:

-Մարզպետի ուղղությամբ: Շատ հստակ է:

-Այս հարցը ինձ համար էլ էսպես մի քիչ խորհրդավոր է մնացել, որովհետև տարբեր հակասական կարծիքներ կան: Մեկը ասում է՝ «բռնություն գործադրել է», մյուսն ասում է՝ «չի եղել»: Ի վերջո, քննություն է գնում, թող էնտեղ պարզեն: Ես չեմ ուզում իրավական ոլորտ մտնել, որովհետև ես ընդամենը կուսակցական եմ և պատգամավոր:

-Եթե պարզվի, որ նա, այնուամենայնիվ, աքացիներ տվել է, ի՞նչ միջոցներ կձեռնարկվեն:

-Եթե պարզվի, հենց իրավական կողմն էլ էդ միջոցները կառաջարկի՝ ինչ միջոցների է արժանի այն անձնավորությունը, որը խախտում է: Ես էլ եմ դեմ կնոջ նկատմամբ բռնություն կիրառելու, որովհետև ընդունում եմ տղամարդու և կնոջ իրավահավասարությունը: Դա և բնության կողմից է, և իրավական ոլորտում է, և մարդու իրավունքների հարցում: Էնպես որ խնդիր չկա էստեղ մեզ մոտ կուսակցությունում:

-Հարցը կլուծվի իրավական հարթությունում, ոչ կուսակցական: Այսինքն՝ դուք արժևորում եք մարզպետի դերը:

-Դե, իրավական հարթությունում լուծելուց հետո բնականաբար, մենք մեր կուսակցական ներքին, այսինքն՝ որ տարածքում է ինքը և այլն, էդ խոսակցությունները կլինեն:

-Իսկ Գագիկ Բեգլարյանի դեպքում ինչո՞ւ չսպասեցիք իրավական լուծմանը. նա անմիջապես պաշտոնանկ արվեց:

-Հիմա ասենք, որ բոլոր հարցերը ստանդարտ կաղապարով կլուծվեն, էդպես չի: Ամեն հարց յուրովի իր մեկնաբանությունը ունի, իր տրամաբանությունը ունի: Բնականաբար, տարբեր են լուծվում: Ճիշտն ասած, ես ինքս էլ քննադատաբար միշտ մոտենում եմ նման խնդիրների, բայց քանի որ դրա մասին ես մամուլին չեմ հայտնում, դրա համար հայտնի չի: Իսկապես և Ազգային ժողովում պետք է զուսպ լինել տերմինների ընտրության հարցում, և մարդկանց հետ հարաբերությունների հարցում, հատկապես հասարակական վայրերում: Էնպես որ էնպես չի, որ հանդուրժվում է ամեն ինչ:

-Ի՞նչ տրամաբանությամբ ՀՀԿ-ում չեն պատժվում կամ թեկուզ նկատողություն չեն ստանում ոչ օրինակելի վարք դրսևորած պատգամավորները, մարզպետները կամ այլ քաղաքական գործիչները:

-Դուք ընդհանուր հարց տվեցիք, գուցե անձնավորեիք, որովհետև ասում եք՝ «Հանրապետական կուսակցությունում չեն պատժվում մարզպետները», դուրս է գալիս՝ բոլորն էլ ինչ-որ անպատիժ ինչ-որ բաներ են անում և չեն պատժվում: Կոնկրետ դեպքեր եղել են: Այո, կուսակցական մոտեցում լինելու է, բայց քանի որ քննությունը գնում է, սխալ կլինի հիմա մենք, օրինակ, պարզվի հետո...

-Ես վերջին թարմ դեպքը նկատի ունեմ՝ կապված պատգամավոր Առաքել Մովսիսյանի հետ:

-Եթե պարզվի՝ ոչ թե մարզպետն է խփել, այլ հակառակը: