Համաձայն ազգային վիճակագրական ծառայության հրապարակած տեղեկատվության՝ 2016-ի դեկտեմբեր ամսին հանրապետությունում կատարվել է 77 մլրդ դրամի շինարարություն։ Այդ ամիս կատարված շինարարությունը, համեմատած 2015-ի նույն ամսվա հետ, կրճատվել է 11 %-ով։
Հանրապետությունում շինաշխատանքներ առավել շատ կատարվել են կազմակերպությունների, այնուհետ՝ բնակչության միջոցների հաշվին, որին հաջորդել է միջազգային վարկերով կատարված շինարարությունը։

Վարկային միջոցներով կատարված շինարարություն

2016-ի դեկտեմբերին Հայաստանում միջազգային վարկային միջոցներով կատարվել է 11 մլրդ դրամի շինարարություն, որը ընդհանուր շինարարության ամբողջ ծավալի գրեթե 15%-ն է կազմում։ Համեմատած 2015-ի դեկտեմբերի հետ՝ չնայած նվազել են շինարարությանը հատկացված ֆինանսական միջոցների ծավալները, ամենամեծ ծավալով՝ 35 %-ով, աճել է միջազգային վարկերի հաշվին կատարված շինարարությունը։

Միջազգային վարկային միջոցներով կատարված շինարարության գումարների գրեթե 50 %-ը հատկացրել է Համաշխարհային բանկը, ապա՝ Ասիական զարգացման բանկը։

Ի դեպ, պաշտոնական տվյալներով՝ 2016-ի դեկտեմբերին, համեմատած 2015-ի նույն ամսվա հետ, միջազգային այս բանկերից շինարարական աշխատանքների համար ավելի շատ գումար է հատկացվել։

Շինարարությունը՝ ըստ տեսակների

ԱՎԾ-ի առանձնացված տվյալները փաստում են՝ Հայաստանում դեկտեմբեր ամսին ամենաշատը կատարվել է անշարժ գույքի հետ կապված շինարարություն. այն կազմել է 26%, դրան հաջորդել է հանքագործական արդյունաբերության և բաց հանքերի շահագործմանն առնչվող շինարարությունը, ապա՝ տրանսպորտի հետ կապված շինարարությունը։