Պետական մարմինների համար տարածքներ են վարձակալվում դարձյալ Արամ Հարությունյանին պատկանող ընկերությունից
Ինչպես նախորդ տարիներին, այնպես էլ այս տարի ՀՀ կառավարության առընթեր պետական գույքի կառավարման վարչությունը պետական մարմինների կարիքների համար տարածքներ է վարձակալել գյուղատնտեսության նախկին նախարար, ջրային տնտեսության պետական կոմիտեի նախկին նախագահ Արամ Հարությունյանի ընկերությունից՝ «Հանարդնախագիծ» ԲԲԸ-ից:
Երևան քաղաքի Տիգրան Մեծի 4 հասցեում գտնվող «Հանարդնախագիծ» ԲԲԸ-ին պատկանող շենքում 1750 քառակուսի մետր մակերեսով գրասենյակային տարածք վարձակալելու համար հունվարի 27-ին պետական գույքի կառավարման վարչության և ԲԲԸ-ի միջև կնքվել է պայմանագիր, որի գինը կազմել է 103 միլիոն 614 հազար դրամ:
2017թ. համար «Հանարդնախագիծ» ԲԲԸ-ից տարածքներ է վարձակալվել նաև պետական այլ մարմինների համար:
Մասնավորապես՝ նույն հասցեում գտնվող շենքում 350 քառ. մետր մակերեսով գրասենյակային տարածք է վարձակալվել նաև ՀՀ ազգային վիճակագրական ծառայության Երևան քաղաքի գործակալության համար: Դարձյալ հունվարի 27-ին պայմանագիր է կնքվել նույն կողմերի միջև: Պայմանագրի գինը կազմել է 20 միլիոն 722 հազար 800 դրամ:
Իսկ ՀՀ միջազգային տնտեսական ինտեգրման և բարեփոխումների նախարարության համար նույն հասցեում վարձակալած 400 քառ. մետր մակերեսով գրասենյակային տարածքի համար պայմանագրով սահմանվել է 23 միլիոն 683 հազար դրամ վարձավճար:
Նշենք, որ նախորդ տարիներին ևս նմանատիպ պայմանագրեր է կնքվել Արամ Հարությունյանին պատկանող ընկերության հետ: Օրինակ՝ «Հանարդնախագիծ» ԲԲԸ-ից վարձակալած տարածքի համար 2014թ. վճարվել է 16 միլիոն 667 հազար դրամ, իսկ 2015թ.-ին՝ 123 միլիոն 840 հազար դրամ: ԱԺ նախագահ Գալուստ Սահակյանի որդու՝ Արման Սահակյանի կողմից ղեկավարվող պետական գույքի կառավարման վարչությունը 2015թ. հունվարի 30-ին մեկ տարվա պայմանագիր էր կնքել ընկերության հետ: Իսկ ֆինանսների նախարարության համար վարձակալված ընդհանուր տարածքը այդ տարի կազմել էր 2015 քմ, որի ամսական վարձավճարը կազմել է 10 միլիոն 320 հազար դրամ:
Կառավարության որոշմամբ՝ 2014թ. նույն ԲԲԸ-ից տարածք էր վարձակալվել արդեն լուծարված կառավարությանն առընթեր ճարտարապետության պետական կոմիտեի համար՝ 16 միլիոն 667 հազար դրամ արժեքով:
Մեկնաբանել