Տեսանյութեր
Լուսանկարներ
«Մտածում են՝ տասից հինգն էլ չգա, մուծի այդ տուգանքը, օգուտ է»,-ասում է Մայիս Մարգարյանը
Մայիս Մարգարյանն օրեր առաջ ստացել է իր հերթական տուգանքը՝ կարմիր գծանշված տարածքում մեքենայի կայանման դիմաց չվճարելու համար։ Ասում է՝ ավտոմեքենան կայանել է Զաքյան փողոցում, որտեղ ձյան հաստ շերտը ծածկել էր կարմիր գիծը, որի պատճառով չի երևացել կարմիր գծանշումը, սակայն այնտեղ կայանելու դիմաց չվճարելու հիմքով ստացել է 5000 դրամ տուգանք։
Մայիսը մշտապես «խնդիրներ է ունենում» կարմիր գծանշված տարածքներում ավտոմեքենան կայանելու պատճառով։
Ասում է՝ մեքենան թեև երբեմն կայանում է գծանշված տարածքում, սակայն այն չի հսկվում տեսախցիկների կողմից, ծառայություն չի մատուցվում այդ ընկերության կողմից, բայց և ամեն անգամ տուգանվում է՝ շրջող մեքենայի կողմից արված լուսանկարների հիմքով։
«Այսինքն՝ նույնիսկ ծառայություն չեն մատուցում։ Մեքենաս գան, ջարդեն, տանեն, նույնիսկ ապացուցող հոլովակ չկա»,-նշում է նա։
Շրջող ավետոմեքենաների կողմից արված լուսանկարների հիման վրա արձանագրված տուգանքներն ամեն անգամ բողոքարկում է, և դրանք չեղարկվում են, նրա փոխանցմամբ, ապացույցների բացակայության պատճառով։
«Տուգանքի բողոքարկման օրը գնում եմ քաղաքապետարան, ասում՝ տվեք ինձ խախտումս ապացուցող հոլովակը։ Իհարկե չի լինում այն, և տուգանքի որոշումը բեկանում են։ Ողջ խնդիրն այն է, որ շատ զբաղված մարդ եմ։ Ամեն անգամ իրենց ուզած ժամին գնում, նույն ապացուցող հոլովակն եմ ուզում, ամեն անգամ չեղարկում են»։
Մայիսն առաջարկում է ներմուծել մի համակարգ, որով կզտնվի մեքենաների միջոցով արված լուսանկարների տուգանքներն ու նկարահանված տեսանյութերի հիմքով արձանագրված խախտումները, որի արդյունքում վարորդներից ոմանք, ինչպես և նա, ստիպված չեն լինի ամեն անգամ գնալ քաղաքապետարան՝ տուգանքի որոշումը բեկանելու համար։
«Մտածում են՝ տասից հինգն էլ չգա, մուծի այդ տուգանքը, օգուտ է էլի։ Մնացածն էլ իմ պես. ամեն անգամ պետք է գնան, ասեն՝ ու՞ր է այդ հոլովակը, ու այդպես որոշումը բեկանեն։ Նրանց մեքենայի միջից արված լուսանկարը ապացույց չէ. միակ ապացույցը կարող է լինի տեսահոլովակը»,- ասում է նա։
Հիշեցնենք, որ ամիսներ առաջ կրկին գրել էինք, որ Երևանի Մամիկոնյանց փողոցի մի հատված կարմիր գծանշաններով գծանշվել է, սակայն տարածքում տեղադրված չէ վճարովի կայանատեղիի վերաբերյալ ցուցանակ, տեսանկարահանող սարք և տեղեկատվական տեխնոլոգիաների ոլորտի մի խումբ մասնագետներ, որոնց աշխատավայրն այդ փողոցում է, բողոքարկում էին յուրաքանչյուր տուգանք, ինչից հետո տուգանքի որոշումը կրկին չեղարկվում էր։
Հավելենք, որ օրեր առաջ Երևանի քաղաքապետարանը հաղորդագրություն էր տարածել, նշելով, որ մինչև քաղաքի փողոցներում իրականացվող ձնամաքրման աշխատանքների լիարժեք ավարտը ավտոկայանատեղերի տուրքի չվճարման հայտնաբերված իրավախախտումների վերաբերյալ գործերով վարույթներ չեն իրականացվի և վարչական տույժեր չեն կիրառվի:
Մեկնաբանություններ (2)
Մեկնաբանել