Կառավարությունն այսօր չքննարկվող կարգով հավանության արժանացրեց արտաքին գործերի նախարար Էդվարդ Նալբանդյանի որոշման նախագիծը, որով Երևանի քաղաքապետին առաջարկվում էր Երևանի սեփականությունը հանդիսացող Ազատության պողոտայի 1/16 հասցեում գտնվող 369 մ² մակերեսով հողամասը անհատույց օգտագործման իրավունքով հատկացնել Հայաստանում Արաբական Միացյալ Էմիրությունների դեսպանությանը` դեսպանի կեցավայրի տեղակայման համար` պահպանելով փոխադարձության սկզբունքը:

Համաձայն կառավարություն ներկայացված փաստաթղթերի՝ Արաբական Միացյալ Էմիրությունների դեսպանությունը 2016 թվականի հունվարին գնել է Ազատության 1/16 հասցեում գտնվող հողամասը՝ դեսպանի կեցավայրի համար: Հողամասը գտնվել է պարսպապատված վիճակում: Սակայն այն ձեռք բերելուց հետո դեսպանատան շենքը նախագծելու համար կատարվել են գեոդեզիա և սահմանների ճշգրտում, ինչի արդյունքում պարզվել է, որ դեսպանատան կողմից ձեռք բերված տան պարիսպների ներսում տան առջևի և աջ հատվածում կա տարածք, որը գրանցված չէ սեփականության վկայականում և չի համապատասխանում տան հատակագծին` չնայած, որ գտնվում է կառուցապատված պարսպի ներսում: Դրա փոխարեն տան ձախ կողմում կա տարածք, որր սեփականության վկայականով պատկանում է դեսպանությանը, սակայն պարսպից դուրս է և այնտեղ կառուցված է ավտոճանապարհ:

Այդ պատճառով դեսպանությունը դիմել է Երևանի քաղաքապետարան` վերոնշյալ հողատարածքները փոխանակելու հարցով, ինչի արդյունքում հողամասի ընդհանուր տարածքից մի հատված արդեն իսկ փոխանակվել է, իսկ մնացած տարածքը հանդիսանում է հուշարձանի պահպանության գոտի, որն էլ գործադիրը որոշեց անհատույց օգտագործման իրավունքով տրամադրել դեսպանությանը:

լուսանկարը` Paolo Rosa / Flickr.com