Տեսանյութեր
Լուսանկարներ
ՄԻՊ-ը Բրյուսելում հանդիպել է շուրջ 30 միջազգային իրավապաշտպան կազմակերպությունների հետ
Աշխատանքային այցով Բրյուսելում գտնվող Հայաստանի մարդու իրավունքների պաշտպան Արման Թաթոյանը երեկ հանդիպել է շուրջ 30 միջազգային իրավապաշտպան կազմակերպությունների հետ: Այս մասին տեղեկացնում է պաշտպանի աշխատակազմը:
Հանդիպումը կազմակերպվել է Հայաստանի եվրոպացի բարեկամներ կազմակերպության աջակցությամբ: Կազմակերպությունների թվում են եղել Մարդու իրավունքների ազգային հաստատությունների եվրոպական ցանցը, Խոշտանգումների զոհերի ռեաբիլիտացիայի միջազգային կազմակերպությունը, Բաց հասարակության եվրոպական քաղաքականության ինստիտուտը: Հանդիպմանը մասնակցել են նաև Եվրամիության ներկայացուցիչներ:
Քննարկմանը Մարդու իրավունքների պաշտպան Արման Թաթոյանը ներկայացրել է «Մարդու իրավունքների պաշտպանի մասին» նոր օրենքի կարգավորումներ: Հատուկ ընգծվել է, որ նոր օրենքը նաև նպատակ ունի բարձրացնելու Հայաստանում օմբուդսմանի հաստատության ինստիտուցիոնալ դերը երկրի իրավական համակարգում: Դրանից բացի, քննարկվել է մարդու իրավունքների հետ կապված իրավիճակը Հայաստանում ինչպես նաև Մարդու իրավունքների պաշտպանի աշխատանքն այդ ոլորտում: Արման Թաթոյանի կողմից կարևորվել է աշխատանքը հասարակական կազմակերությունների և լրագրողների հետ: Մասնավորապես, քննարկվել են ՀԿ-ների հետ աշխատանքի նոր սկզբունքները, որ դրված են օրենքում:
Մանրամասն քննարկվել են նաև Արցախի Մարդու իրավունքների պաշտպանի մասնակցությանն ու դեպի Արցախ այցերին վերաբերող հարցեր: Ա.Թաթոյանը մանրամասն ներկայացրել է Արցախի օմբուդսմանի զեկույցները, դրանցում տեղ գտած՝ դաժանությունների վերաբերյալ փաստերը: Մասնավորապես, մասնակիցների մեկը հարցրել է Ա.Թաթոյանի կարծիքը այսպես կոչված Բաքվի պլատֆորմի մասին: Դրան Արման Թաթոյանի կողմից պատասխան է տրվել, որ այն իրական չէ և չի կարող ընդունելի լինել, երբ ապրիլյան պատերազմն ակնհայտորեն ցույց տվեց, որ դաժան սպանությունները կապված էին միայն այն փաստի հետ, որ մարդիկ հայ են:
«Ադրբեջանում այնքան մեծ է ատելության մակարդակը հայերի նկատմամբ, որ չի կարող լինել իրական պլատֆորմ հենց այն էլ Բաքվում: Այսպիսի դիրքորոշումը հիմնավորվել է կոնկրետ օրինակներով Արցախի մարդու իրավունքների պաշտպանի զեկույցից: Մյուս հարցին ի պատասխան Արման Թաթոյանն ընդգծել է նաև, որ պատրաստ է Հայաստանի վերաբերող հարցերի հետ կապված հանդիպել, բայց սկզբունքային դիրքորոշում է այն, որ Արցախին առնչվող հարցերով պետք է բացառապես մասնակցի քննարկումների Արցախի Մարդու իրավունքների պաշտպանը, քանի որ մարդու իրավունքների հետ կապված հարցերը որևէ կապ չունեն քաղաքականության հետ: Դրանից բացի, Ա.Թաթոյանը կարևորել է լրագրողների աշխատանքը Արցախում և նշել, որ հիմա էլ ավելի պետք է ակտիվացնել աշխատանքը որպեսզի ակտիվանան այցերը Արցախ: Եվս մեկ անգամ կարևորվել այն սկզբունքը, որ մարդու իրավունքները սահմաններ չեն ճանաչում և արցախի քաղաքացիական հասարակության ու ժողովրդավարական ինստիտուտները պետք է ներգրավված լինեն բոլոր միջազգային հանդիպումներում»,- գրված է ՄԻՊ աշխատակազմի տարածած հաղորդագրության մեջ:
Մեկնաբանել