Տեսանյութեր
Լուսանկարներ
Հայաստանը օդային հաղորդակցությունների համաձայնագիր կկնքի նաև Սիրիայի հետ
Կառավարությունն այսօր չքննարկվող կարգով հավանության արժանացրեց քաղաքացիական ավիացիայի գլխավոր վարչության պետ Սերգեյ Ավետիսյանի առաջարկը, որով Հայաստանի և Սիրիայի Արաբական Հանրապետության կառավարությունների միջև կկնքվի օդային հաղորդակցությունների մասին համաձայնագիր։
Համաձայն կառավարություն ներկայացված հիմնավորման՝ համաձայնագրի կնքումն ուղղված է օդային հաղորդակցությունների ոլորտում երկու պետությունների հարաբերությունների լիարժեք և պատշաճ իրավական կարգավորմանը, «Բաց երկնքի» քաղաքականության սկզբունքների ներդրմանը և երկու պետությունների ավիաընկերությունների համար ազատ մրցակցային դաշտի ապահովմանը:
Կնքվող համաձայնագրի հավելվածներով սահմանվում են յուրաքանչյուր կողմի նշանակած ավիաընկերության կամ ավիաընկերությունների կողմից շահագործման համար համաձայնեցված հաղորդակցությունների երթուղիների ցանկը, սահմանվում են դրույթներ ոչ կանոնավոր չվերթների վերաբերյալ և այլն:
«Համաձայնագրի կնքման արդյունքում օդային հաղորդակցությունների ոլորտում երկու պետությունների հարաբերությունները լիարժեք կկարգավորվեն միջկառավարական համաձայնագրի շրջանակում, ինչպես նաև Համաձայնագրի կնքումը կնպաստի երկու պետությունների միջև զբոսաշրջության և տնտեսական հարաբերությունների զարգացմանը»,- ասվում է որոշման նախագծում։
Հիշեցնենք, որ չքննարկվող կարգով կառավարությանն է ներկայացվել նաև Հայաստանի Հանրապետության և Ավստրալիայի Միության կառավարությունների միջև օդային հաղորդակցությունների մասին համաձայնագրի կնքմանը համաձայնություն տալու` կառավարության որոշման նախագիծը:
Մեկնաբանել