Այսօր «Փյունիկ» հաշմանդամների միության, «Հայկական ճամբար» կազմակերպության և «Էմանուել» ՀԿ-ի անդամները՝ հաշմանդամություն ունեցող երեխաներ և մեծահասակներ, հանրությանը ներկայացրին իրենց ձեռքի աշխատանքները:

ՄԱԿ-ի հանրային տեղեկատվության վարչության հայաստանյան գրասենյակի օժանդակությամբ կազմակերպված ցուցահանդեսը նվիրված է Հաշմանդամություն ունեցող անձանց միջազգային օրվան, որին թեման է «Լիակատար մասնակցություն և հավասարություն»:

«Շատ կարևոր է այն փաստը, որ Հայաստանը ՄԱԿ-ի այն մի քանի անդամ երկրների թվում է, որոնք վավերացրել են Հաշմանդամություն ունեցող անձանց իրավունքների մասին կոնվենցիան, որը հաստատում է պետությունների իրավական պարտավորությունները' խթանելու և պաշտպանելու հաշմանդամություն ունեցող անձանց իրավունքները»,- ասաց ՄԱԿ-ի Հանրային տեղեկատվության վարչության ներկայացուցիչ Մարիա Դոցենկոն:

30 տարի է անցել այն օրից, երբ ՄԱԿ-ն առաջին անգամ նշեց Հաշմանդամություն ունեցող անձանց միջազգային տարին «Լիակատար մասնակցություն և հավասարություն» թեմայով: Այս ընթացքում էական առաջընթաց է նկատվել հաշմանդամություն ունեցող անձանց իրավունքների իրազեկման աճի և այդ իրավունքները գիտակցելու միջազգային նորմատիվ շրջանակներն ամրապնդելու հարցում՝ սկսած Գործողությունների համաշխարհային ծրագրից (1982) մինչև Հաշմանդամություն ունեցող անձանց իրավունքների կոնվենցիա (2006):

Հաշմանդամություն ունեցող անձանց միջազգային օրվա ամենամյա հիշատակումը նպատակ ունի նպաստել հաշմանդամության խնդիրների ըմբռնմանը և աջակցել հաշմանդամություն ունեցող անձանց իրավունքների պաշտպանությանը և բարեկեցությանը: Այն նաև նպատակ ունի բարձրացնել իրազեկությունն այն ձեռքբերումների վերաբերյալ, որոնք կարող ենք ունենալ հաշմանդամություն ունեցող մարդիկ քաղաքական, սոցիալական, տնտեսական և մշակութային կյանքի բոլոր բնագավառներում ներգրավելու արդյունքում: