Ազգային պատկերասրահի կայքում հաշվառված են 14 հազար թանգարանային նմուշի տվյալներ
«Հելիքս» կազմակերպությունը ստեղծել է Հայաստանի ազգային պատկերասրահի նոր, ժամանակակից դիզայնով և տեխնիկական հնարավորություններով, պաշտոնական կայքը՝ www.nga.am, www.gallery.am։ Ստեղծվել է նաև պատկերասրահի հավաքածուի առանձնահատկություններին համապատասխան հատուկ շտեմարան, որի միջոցով շարունակաբար արդեն իսկ թվայնացվում է Հայաստանի ազգային պատկերասրահի ողջ հավաքածուն։
Պատկերասրահի անձնակազմի ավելի քան մեկ ու կես տարվա աշխատանքի արդյունքում ստեղծվել և մուտքագրվել է կայքի բովանդակությունը՝ պատմության, հավաքածուի, գործունեության, աշխատակազմի, միջոցառումների, կրթական ծրագրերի, հրատարակումների, մասնաճյուղերի և այլ բաժիններում։
Պատկերասրահի կայքի շտեմարան բաժնում Հայաստանի թանգարանային ոլորտում առաջին անգամ թվայնացված ներկայացվելու է ողջ հավաքածուն: Ներկայումս շտեմարանի բազայում հաշվառված են պատկերասրահի շուրջ 26.000 թանգարանային նմուշից մոտ 14.000-ի տվյալները, որոնցից ավելի քան 11.000-ը հասանելի է շտեմարանի այցելուներին: Բաժինը մշտապես համալրվելու է։ Հետագայում հասարակությանը առաջարկվելու են նաև ուսուցողական, ժամանցային և այլ էջեր։
Հայաստանի ազգային պատկերասրահի կայքը ունի նաև օտար լեզուներով (անգլերեն, ռուսերեն) տարբերակներ: ՀՀ մշակույթի նախարարությունը տեղեկացնում է, որ կայքը ստեղծվել է ՀՀ կառավարության նախաձեռնությամբ և ֆինանսավորմամբ:
Մեկնաբանել