Կառավարությունը հավանության արժանացրեց տնտեսական զարգացման և ներդրումների նախարար Սուրեն Կարայանի` կառավարություն ներկայացրած որոշման նախագիծը, որով «Ֆիկուս պակս սի այ էս» ընկերությանը տրամադրվելու է «Ալյանս» ազատ տնտեսական գոտում շահագործման թույլտվություն։

Ընկերությունը զբաղվելու է նորարական տեխնոլոգիաներով փաթեթավորման նյութերի արտադրությամբ։ Ազատ տնտեսական գոտում շահագործման թույլտվության ժամկետը, ըստ օրենքի, սահմանվում է 5 տարի:

««Ալյանս» ազատ տնտեսական գոտում շահագործողների գործունեությունը հնարավորություն կընձեռի ներգրավել ներդրումներ, խթանել բարձր և տեղեկատվական տեխնոլոգիաների ոլորտում ստեղծված արդյունքի արտահանմանը, նպաստել տվյալ հատվածում հայկական բրենդի ճանաչմանն ու տարածմանը»,- գրված է կառավարություն ներկայացված որոշման նախագծում։

Համաձայն իրավաբանական անձանց պետական ռեգիստրի տվյալների՝ «Ֆիկուս պակս սի այ էս»-ը գրանցվել է 2016-ի սեպտեմբերին, հիմնադիրը Նիկոլաոս Գիաննակոպուլոսն է։

Ամիսներ առաջ անդրադարձել էինք, որ Հայաստանում այժմ գործում է ազատ տնտեսական երկու գոտի՝ «Ալյանս»-ն ու «Մերիդիան»-ը։

«Ալյանս» գոտին ստեղծվել է կառավարության 2013 թվականի որոշմամբ։ Այս գոտում գործունեություն ծավալող ընկերություններն ունեն բարձր և նորարական տեխնոլոգիաների արտադրության և արտահանման ուղղվածություն։ Իսկ «Մերիդիան»-ը հիմանդրվել է կառավարության 2014 թվականի փետրվարի որոշմամբ։ Սակայն այս գոտու շահագործման մեկնարկը տրվել է 2015թ-ին։ Այս գոտում, որպես գործունեության տեսակ, սահմանված են արտադրաարդյունաբերական` ոսկերչության, ակնագործության ու ժամագործության ոլորտները: