Երևանում չինարենի խորացված ուսուցմամբ դպրոցի շինարարության համար նախատեսված տարածքից «Արմենտել» ընկերությանը պատկանող կապի մալուխների «դուրս տեղափոխման» նպատակով կառավարության պահուստային ֆոնդի հաշվից կրթության և գիտության նախարարությանը կհատկացվի 5 միլիոն դրամ։

Ինչպես «Հետք»-ի հետ զրույցում պարզաբանեց կրթության և գիտության նախարարության աշխատակից Մասիս Աղայանցը՝ չինական դրպոցի տարածքը 1000 մետրով ընդարձակվել է՝ 14 հազար քմ-ից դառնալով 15 հազար քմ, և ավելացված 1000 մետրի մակերեսի տարածքում «հայտնվել են» ընկերության մալուխները, որոնք պետք է հեռացվեն՝ շինարարական աշխատանքներին չխոչընդոտելու համար։

Որոշման այս նախագիծը այսօրվա նիստում կառավարությունը բավարարեց կրթության և գիտության նախարար Լևոն Մկրտչյանի առաջարկով: «Նախագծի հաստատման արդյունքում պայմաններ կստեղծվեն Հայաստանում չինական դպրոցի շինարարական աշխատանքների բնականոն ընթացքը ապահովելու համար»,- գրված է նախագծում։