HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Հերքում

Կապանի լեռնահարստացման կոմբինատի գլխավոր տնօրենի՝ հասարակայնության հետ կապերի և սոցիալական քաղաքականության գծով տեղակալ Վահրամ Ավագյանը հերքման տեքստ է ներկայացրել «Հետքի» խմբագրությունը: Այն նույնությամբ հրապարակում ենք ստորեւ:

«Սույնով հայտնում ենք, որ իրականությանը չեն համապատասխանում և այլ աղբյուրի հղումներ չեն պարունակում «Հետք» ինտերնետային թերթում 2017թ. փետրվարի 11-ին, ժամը 16:58-ին հրապարակված «Կապանի լեռնահարստացման կոմբինատում աշխատակիցների իրավունքները խախտում են, սակայն նրանք լռում են» վերնագրով հոդվածում (այսուհետ՝ Հոդված) առկա հետևյալ պնդումները.

  1. Հոդվածի վերնագրում տրված «Կապանի լեռնահարստացման կոմբինատում աշխատակիցների իրավունքները խախտում են» պնդումը:

  2. «Դմիտրի Ուշկովը ավելի քիչ ծախսեր ունենալու համար որոշել է օժանդակ կազմակերպությունների միջոցով իրականացնել աշխատանքների մի մասը: Օրինակ` այլևս կոմբինատի աշխատակից չեն համարվում լվացքատան աշխատակիցները, հավաքարարները, այլ հաստիքների մասով ևս գործում է այս փոփոխությունը, ինչը աշխատակիցների դժգոհությունն է առաջացրել: Նրանք, որպես օժանդակ կազմակերպության աշխատակիցներ, ավելի քիչ են վարձատրվում, ասում են՝ զրկվել են մի շարք արտոնություններից (օրինակ` ապահովագրությունից)» պնդումը:

  3. Հոդվածում առանց հեղինակի հիշատակման, որպես ուրիշի ուղղակի խոսք մեջբերված. «Տնօրենը մեզ ստրուկ է անվանում, ասում է` իմ փողն է, դուք էլ իմ վարձուները, ինչպես կուզեմ, այդպես էլ կդիմեմ: Որոշները չեն դիմանում, հայհոյում են ու աշխատանքից ազատվում, ավելի կարիքավորներս լռում ենք, տեսնենք ինչ կլինի» պնդումը:

  4. «Խախտված իրավունքներից ու «անմարդկային» վերաբերմունքից զատ՝ կոմբինատի աշխատողներին վրդովեցնում է մեկ այլ հանգամանք ևս` դրսից բերված մասնագետներին տրվող աշխատավարձի չափը: Դրսից աշխատող են բերում, ստանում է 17 հազար դոլար աշխատավարձ, մեզ՝ կապանցիներիս, 100 հազար են վճարում» պնդումը:

  5. «վարչակազմում կան մարդիկ, որոնք 50 հազար դոլար են ստանում» պնդումը:

Սույն հերքումը հրապարակվում է «Զանգվածային լրատվության մասին» ՀՀ օրենքի (այսուհետ՝ Օրենք) 8-րդ հոդվածի 1-ին կետով սահմանված կարգով 20.02.2017թ. ներկայացված պահանջի հիման վրա, Օրենքի 8-րդ հոդվածի 2-րդ կետով սահմանված ժամկետում, Օրենքի 8-րդ հոդվածի 3-րդ կետի պահանջների պահպանմամբ»:

Հ.Գ. Խմբագրությունն առաջիկայում կանդրադառնա հոդվածում բարձրացված հարցերին, Կապանի լեռնահարստացման կոմբինատի նախկին աշխատակիցների դատական հայցերին, ինչպես նաեւ կոմբինատի գործունեությանը բնապահպանական տեսանկյունից:

 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter