Կառավարությունը հավանության արժանացրեց արտաքին գործերի փոխնախարար Շավարշ Քոչարյանի որոշման նախագիծը, որով 2005 թվականին Պեկինում կնքված համաձայնագրում փոփոխություն կկատարվի։

Ինչպես նշվում է կառավարություն ներկայացված փաստաթղթում՝ հայ-չինական կողմերը բարեկամական խորհրդակցությունների ճանապարհով պայմանավորվել են, որ հայկական կողմը անհատույց տնօրինման իրավունքով չինական կողմին կտրամադրի Ադմիրալ Իսակովի 17/4 հասցեում գտնվող հողատարածքը՝ ՉԺՀ դեսպանության շենքերի կառուցման նպատակով: Իսկ չինական կողմը հայկական կողմին կփոխանցի Մարշալ Բաղրամյանի պողոտա 12 հասցեում գտնվող շինությունը և հողատարածքը՝ նոր դեսպանության շինարարության ամբողջական ավարտից և շահագործմանը հանձնելուց հետո մեկ տարվա ընթացքում: Մինչ այդ, չինական կողմը անհատույց կօգտագործի այդ հասցեում գործող շինությունը և հողատարածքը, որն այժմ ՀՀ-ում ՉԺՀ դեսպանությունն է:

«Երկու կողմերը խոստանում են փոխադարձաբար չներկայացնել լրացուցիչ պահանջներ վերոնշյալ շինության և հողատարածքի փոխանցման ժամանակ՝ միևնույն ժամանակ կարգավորելով դրանց շահագործման և օգտագործման հետ կապված բոլոր հարցերը»,- նշված է որոշման նախագծում:

լուսանկարը` wikipedia.org