Տնտեսական զարգացման և ներդրումների նախարար Սուրեն Կարայանը կառավարության նիստից հետո լրագրողների հետ զրույցում նշեց, որ Ֆրանսիա իրենց կատարած այցից հետո ֆրանսիական երկու կազմակերպություններ հետաքրքրություն են ցուցաբերել Հայաստանում ներդրումներ կատարելու հարցում և առաջիկայում կայցելեն Հայաստան՝ ներդրումներ իրականացնելու համար։

Ներդրում անել պատրաստվող ընկերությունները, նախարարի փոխանցմամբ, դեղագործության և սննդի արդյունաբերության ոլորտներով են հետաքրքրված։

Լրագրողներից մեկի այն դիտարկմանը, թե ֆրանսիական ընկերությունները Հայաստանից հեռանում են, որի օրինակ կարող են լինել «Օրանժ» ընկերության գնումը «Յուքոմ»-ի կողմից և «Քարֆուր» ընկերության ունեցած խնդիրները, Կարայանը պատասխանեց. «Համաձայն չեմ, որ ֆրանսիական ներդրումները գնում են։ «Օրանժ»-ի գործարքը եղել է բիզնես վաճառք, վաճառք է տեղի ունեցել։ Իսկ «Քարֆուր»-ը հիմա Հայաստանում գործում է»։

Ի պատասխան այն հարցին, թե արդյոք օտարերկրյա ընկերություններին չեն մտահոգում Հայաստանի փակ սահմանները, նախարարը պնդեց հակառակ հանգամանքը, թե «այդ ներդրողներին դուր է գալիս, որ Հայաստանի միջոցով հնարավորություն է ստեղծվում մուտք գործել մեծ շուկաներ, մասնավորապես՝ ԵԱՏՄ երկրներ, օգտվել Հայաստանին տրամադրված ազատականացված ռեժիմից»։