ՀՀ բնապահպանության նախարար Արամ Հարությունյանն ընդունել է Կովկասի բնության հիմնադրամի գործադիր տնօրեն Դևիդ Մորիսոնին, որի Հայաստան այցի նպատակն էր ՀՀ բնապահպանության նախարարության հետ համաձայնեցնել 2012թ. Հայաստանի Հանրապետության պահպանվող տարածքներին հիմնադրամի կողմից ցուցաբերվելիք աջակցության հարցերը:

2012 թվականին  հիմնադրամը  իր աջակցությունն ուղղելու է «Խոսրովի անտառ», «Շիկահող» պետական արգելոցներին և «Դիլիջան», «Արևիկ», «Արփի լիճ» ազգային պարկերին` շուրջ 243 հազ եվրո:

Միջոցները հիմնականում նպատակաուղղվելու են որպես համաֆինանսավորում պետական  բյուջեից հատկացվող  գումարներին:

Հանդիպման ժամանակ քննարկվեց նաև Կովկասի բնության հիմնադրամի համալրման հարցը, ինչի համար պարոն Մորիսոնն առաջարկեց, որպեսզի հայկական սփյուռքը իր ներդրումն ունենա հիմնադրամում` հետագայում այդ միջոցները ՀՀ պահպանվող տարածքներին ուղղելու համար:

Նախարար Արամ Հարությունյանն առաջարկեց. կորպորատիվ համագործակցության միջավայր ստեղծելու նպատակով 2012թ.  փետրվար-մարտ ամիսներին Երևանում կազմակերպել պոտենցիալ դոնորների հավաք, որն իր մեջ կներառի բիզնեսը, մասնավորապես` հանքարդյունաբերությունը, բանկային համակարգը, տեղական և միջազգային բնապահպանական կազմակերպությունները:

Նախատեսվում է մինչև 2020թ. Կովկասի բնության հիմնադրամի միջոցներով ՀՀ պահպանվող տարածքներին հատկացնել շուրջ 5 մլն եվրոյի օժանդակություն:

Բնապահպանության նախարար Արամ Հարությունյանը և Կովկասի բնության հիմնադրամի  գործադիր տնօրեն Դեվիդ Մորիսոնը հույս հայտնեցին, որ քննարկված հարցերը կյանքի կկոչվեն, իսկ յուրաքանչյուր կատարված ներդրում կծառայի իր նպատակին: Այս մասին տեղեկացնում է ՀՀ բնապահպանության նախարարության մամուլի ծառայությունը: