Հերմինե Վիրաբյան

Թիվ 10 ընտրատարածքի 26/3 ընտրատեղամասի դռները փակելուց 10 րոպե առաջ հանձնաժողովի անդամները շնորհավորեցին 1000-րդ ընտրողին և վերջինիս նվիրեցին շոկոլադ։ Տեղամասում ներկա են վստահված անձինք և՛ կուսակցական, և՛ ընդդիմադիր դաշինքներից և կուսակցություններից, սակայն դա լարվածություն չի առաջացնում, ավելին՝ մթնոլորտը ջերմ է և ընկերական։

1647 գրանցված քաղաքացիներից ընտրության է մասնակցել 1002 հոգի, որոնցից 45-ը օգնողների միջնորդությամբ։ Ըստ «Իրավունքի Եվրոպա» կազմակերպության դիտորդի՝ ընտրություններն այս տեղամասում անցել են հանգիստ, չեն նկատվել խախտումներ, հոսանքազրկում տեղի չի ունեցել։
Մեկնարկել է ընտրությունների հաշվարկը։ Հիշեցնենք, որ Ազգային ժողովի ընտրությունների համար թեկնածություն էին առաջադրել 4 դաշինք և 5 կուսակցություն։

Ստորև ներկայացնում ենք դաշինքների անվանումներն ու կարգախոսները՝

• «ԵԼՔ» դաշինք. «Ընտրություն, փոփոխություն, հաղթանակ»,

• «Օհանյան-Րաֆֆի-Օսկանյան» դաշինք. «Ժառանգություն, համախմբում, հաղթանակ»,

• «Ծառուկյան» դաշինք. «Փոփոխությունների և կառուցելու ժամանակն է»,

• «ՀԱԿ-ՀԺԿ» դաշինք. «Խաղաղություն, հաշտություն, բարիդրացիություն»:

Կուսակցությունների անվանումներն ու կարգախոսները՝

• Հայաստանի Հանրապետական կուսակցություն. «Անվտանգություն և առաջընթաց»

• Հայ Հեղափոխական Դաշնակցություն կուսակցություն. «Նոր սկիզբ, արդար Հայաստան»,

• «Ազատ դեմոկրատներ» կուսակցություն. «Մենք կարող ենք»,

• «Հայկական վերածնունդ» կուսակցություն. «Քվեարկի՛ր հանուն փոփոխության, քվեարկի՛ր հանուն վերածննդի»,

• Հայաստանի կոմունիստական կուսակցություն. «Հայրենիք, աշխատանք, սոցիալիզմ»։

Հիշեցնենք, որ Հրազդան քաղաքը Կոտայքի մարզի մարզկենտրոնն է։
Մարդահամարի տվյալներով Հրազդանում գրանցված է 53,400 բնակիչ։

Հերմինե Վիրաբյան