Առատ ձյան տեղումները և ջերմաստիճանի արագընթաց նվազումը նոր մարտահրավեր հանդիսացան «Էյ Թի Փի» ԲՀ-ի աշնանային ծրագրերի համար: Չնայած հյուսիսում եղանակային պայմանների պատճառով մեր աշխատանքների ժամանակավոր հետաձգմանը, ծառատունկ ծրագիրն այս աշուն հասցրեց տնկել ընդհանուր 87,143 ծառ:  Ընդհանուր առմամբ, 2011 թ-ի ընթացքում  «Էյ Թի Փի»-ն տնկել է 246,397 ծառ:

«Անկանխատեսելի եղանակային պայմանները ստիպեցին «Էյ Թի Փի»-ին ավարտել ծառատունկը համեմատաբար ավելի վաղ այս աշուն: Սակայն, նույնիսկ այս կարճ ժամանակահատվածում «Էյ Թի Փի»-ն զգալի նվաճումներ ունեցավ իր ծառատունկի ծրագրերում»,- նշում է «Էյ Թի Փի» անտառային ծառայությունների ծրագրի ղեկավար Անի Հայկունին:

Այս տարի «Էյ Թի Փի» ԲՀ-ի SEEDS ծրագիրը առավելապես զբաղվել է նախկինում արդեն իսկ տնկված անտառային վայրերի խնամքով` ծառերի կպչողականության ցուցանիշները ապահովելու և բարելավելու նպատակով: Քաղհանի և մաքրման աշխատանքեր են կատարվել անցյալ տարվա ընթացքում տնկված և պահպանված հազարավոր տնկիների շուրջ, ինչպես նաև տնկվել են նոր ծառեր:

Այս աշուն ընդհանուր 62,728 ծառ է տնկվել Լոռվա մարզի Ծաղկաբեր և Ջրաշեն համայնքային հողերի վրա: Գարնանը  SEEDS ծրագիրը տնկել էր 124,057 ծառ:

«Մեր հիմնական մարտահրավերը եղանակն էր այս աշուն:  Մյուս կողմից սեզոնային աշխատողների կողմից իրականացված աշխատանքում մենք ունեցանք ակնհայտ բարեփոխումներ`  տնկիների որակի և խնամքի հետ կապված»,- նշում է SEEDS ծրագրի ղեկավար Վարդան Մելիքյանը:

«Քանի որ մենք ունենք աշխատողների մի խումբ, ովքեր աշխատում են «Էյ Թի Փի» ԲՀ-ի հետ արդեն մի քանի ծառատնկման սեզոն, նրանք ամբողջապես տիրապետում են  «Էյ Թի Փի» ԲՀ-ի կողմից ներկայացված որակի չափորոշիչներին, որպեսզի ապահովեն լավագույն արդյունքները: Ինչևէ, մենք պարբերաբար վերահսկում ենք աշխատանքի որակը, որպեսզի համոզված լինենք, որ ամեն ինչ համապատասխանում է  որակի ամենաբարձր չափանիշներին»,- ասում է Վարդան Մելիքյանը եւ հավելում. «Մեր ծրագրերի նպատակն է ոչ միայն պարզապես տնկել ծառեր, այլ նպաստել տնկված տարածքների հետագա զարգացմանը` որպես էկոհամակարգեր»:

«Մի քանի տասնամյակ անց այդ տնկված տարածքները կդառնան համայնքային այգիներ ու անտառներ և կբավարարեն տեղի բնակիչների կարիրքները` նպաստելով համայնքային զարգացմանը: Ես հավատում եմ, որ գալիք սերունդների կողմից բարձր կգնահատվի «Էյ Թի Փի» ԲՀ-ի դերը Հայաստանի սոցիալական, տնտեսական և բնապահպանական կայունացման գործում»,- ավելացնում է Ա. Հայկունին:

Անտառատնկման նպատակով աճեցված տնկիները ձեռք են բերվում Մարգահովիտ գյուղում գտնվող Ջոն և Արտեմիս Միրաքների անունը կրող տնկարանից և Գետիկ գետի ավազանի տնամերձ տնկարաններից: Տնամերձ տնկարանների զարգացման ծրագիրը մեր`աղքատության կրճատման դեմ ուղղված նախաձեռնություններից մեկն է և «Էյ Թի Փի» ԲՀ-ն այն իրականացնում է 2004թ-ից ի վեր:

«Ի հավելումն  իրականացված մեծածավալ անտառատնկման` «Էյ Թի Փի» ԲՀ-ը համագործակցում է իր համայնքային գործընկերների հետ` փոքր համայնքային անտառների ստեղծման նպատակով: Հատուկ ուշադրություն են արժանանում այն գյուղերը, որոնք գտնվում են անտառածածկ տարածքներից հեռու, քանի որ հատկապես այդ գյուղերը ունեն կանաչ տարածքների կարիք»,- բացատրում է Վ. Մելիքյանը:

Այս աշնանը SEEDS ծրագիրը համայնքային անտառների համար տրամադրեց 5,860 ծառ, իսկ հաջորդ տարի պլանավորվում է տրամադրել լրացուցիչ տնկիներ Կոտայքի մարզի Թեղենիկ և Կարենիս գյուղերին:

Համայնքային ծառատունկ ծրագիրը, որը «Էյ Թի Փի» ԲՀ-ի անդրանիկ ծրագիրն էր, նույնպես հաջողությամբ ավարտել է աշնանային տնկումները: Տնկվել են 24,415 դեկորատիվ և մրգատու ծառեր` ի հավելումն գարնանը տնկված 35,197 ծառերի: «Էյ Թի Փի» ԲՀ-ի հետ համագործակցող նոր համայնքներից էին` Պտղունք, Ագարակ, Սարալանջ, Ձորափ և Ֆերիկ գյուղերը:

Մրգատու ծառեր տրամադրվեցին Ակնաղբյուր, Թեղենիկ և Վարդենուտ գյուղերին` կարիքավոր ընտանիքների համար տնամերձ այգիներ ստեղծելու նպատակով: Մրգատու ծառեր տրամադրվեցին նաև Ֆյուլեր տնաշինական կենտրոնին` Արագածոտն և Լոռի մարզերում ծրագրի շահառուներին աջակցելու նպատակով: «Էյ Թի Փի» ԲՀ-ի կողմից տրամադրված ծառերից մոտ 105.000 կգ  միրգ է հավաքվել ավելի քան 200 համայնքներից: Հավաքվել է ծիրան, բալ, վայրի խնձոր, դեղձ և տանձ:

«Էյ Թի ՓԻ» ԲՀ-ի առաքելությունն է ծառատունկերի միջոցով հայաստանցիների կենսամակարդակի բարելավումը, բնապահպանությունը և բնական էկոհամարգի պահպանումը: «Էյ Թի ՓԻ» ԲՀ-ի երեք հիմնական նախաձեռնություններն են ծառատունկը, բնապահպանական կրթությունը և կայուն զարգացման ծրագրերը:

«Էյ Թի ՓԻ» ԲՀ