Տեսանյութեր
Լուսանկարներ
Վայոց ձորից և Գեղարքունիքից համայնքային 7 տարածք գերակա շահ կճանաչվի
Կառավարությունն այսօրվա նիստում չքննարկվող կարգով հավանության արժանացրեց էներգետիկ ենթակառուցվածքների և բնական պաշարների նախարար Աշոտ Մանուկյանի որոշման նախագիծը, որով Գեղարքունիքի և Վայոց ձորի մարզերում գտնվող որոշ տարածքներ կճանաչվեն գերակա հանրային շահ և կտրամադրվեն «Բարձրավոլտ էլեկտրացանցեր» ընկերությանը։
«Ծրագիրն ունի համապետական կարևոր նշանակություն, քանի որ նպաստում է էներգետիկ անվտանգության և սպառողների էլեկտրամատակարարման հուսալիության բարձրացմանը»,- գրված է որոշման նախագծում։
Ինչպես նշվում է կառավարություն ներկայացված փաստաթղթերում, այս տարածքները գերակա շահ են ճանաչվում՝ Վերակառուցման և զարգացման միջազգային բանկի աջակցությամբ իրականացվող «Էլեկտրամատակարարման հուսալիություն» վարկային ծրագրի շրջանակներում Նորադուզ-Լիճք-Վարդենիս-Վայք-Որոտան-1 220 կՎ բարձրավոլտ էլեկտրահաղորդման օդային գծերի կառուցման նպատակով։
Գերակա հանրային շահ կճանաչվեն յոթ տարածքներ, մասնավորապես՝ մեկ տարածք Գեղարքունիքի մարզի Վերին Գետաշեն գյուղական համայնքում, երկուական՝ Եղեգնաձոր քաղաքային և Ագարակաձոր գյուղական համայնքներում, մեկական էլ՝ Վայոց Ձորի Աղնջաձորի և Մալիշկա գյուղական համայնքներում։
Մեկնաբանել