Այսօր մի խումբ տաքսու վարորդներ բողոքի ակցիա էին կազմակերպել ՀՀ կառավարության շենքի մոտ, ապա շարժվել դեպի ՀՀ Տրանսպորտի, կապի և տեղեկատվական տեխնոլոգիաների նախարարություն, որտեղ նրանց ընդունել և դժգոհություններն է լսել նախարար Վահան Մարտիրոսյանը: Այս մասին տեղեկություն է տարածել տրանսպորտի, կապի և տեղեկատվական տեխնոլոգիաների 
նախարարության լրատվական ծառայությունը:

Տաքսու վարորդները հայտնել են, որ իրենք լիցենզավորված են, բայց լիցենզավորման վճարը շուրջ երկու տարի չեն մուծել: Արդյունքում տուգանվել են, բայց ի վիճակի չեն վճարել այդ բավական մեծ գումարը: Վարորդներն ակնկալում են, որ տուգանքները ներվեն` հիմնավորելով, որ լիցենզավորման վճարները չեն մուծել անհավասար պայմանների պատճառով:Օնլայն տաքսիների գործունեությունը, նրանց խոսքով, խոչընդոտում է իրենց աշխատանքը, այն դեպքում, երբ այդ համակարգերում գրանցված վարորդները չեն լիցենզավորվում և վճարներ չեն կատարում: 

Վահան Մարտիրոսյանը, լսելով վարորդների պահանջները, առաջարկել է միասնական ձևակերպված հարցադրումներ ներկայացնել մինչև վաղը, որպեսզի նախարարությունը քննարկի և փորձի լուծումներ գտնել: Նախարարը միաժամանակ ընդգծել է, որ բոլորը պետք է աշխատեն հավասար պայմաններում և օրենքի շրջանակներում: