Ներդրումային ծրագրի շրջանակներում երեք ընկերություններ կառավարության կողմից այսօրվա նիստում արտոնություն ստացան։ Նրանք հանրապետություն կներմուծեն տեխնոլոգիական սարքավորումներ, հումք և նյութեր՝ օգտվելով ներմուծման մաքսատուրքից ազատման արտոնությունից։

Այս ընկերություններին արտոնություն տրամադրելու առաջարկություն էր ներկայացրել տնտեսական զարգացման և ներդրումների նախարար Սուրեն Կարայանը։

Արտոնություն ստացած առաջին ընկերությունը «Երևանի քիմիա-դեղագործական ֆիրմա» ԲԲԸ-ն է։ Համաձայն կառավարություն ներկայացրած որոշման նախագծի՝ ընկերության կողմից Չինաստանից ներկրված սարքավորումները օգտագործվելու են դեղագործության ոլորտում։

Արտոնություն ստացած հաջորդ ընկերությունը «Այ Պլաստ»-ն է։ Ընկերության կողմից ներմուծվող հումքը կրկին օգտագործվելու է դեղագործության ոլորտում։

Իսկ «ՖԵՆՍԻ» ընկերության կողմից ներմուծված սարքավորումները կօգտագործվեն ոսկերչության ոլորտում։

«Արտոնության առկայությունը լուրջ խթան կհանդիսանա նոր ներդրումային ծրագրերի իրականացման և որպես հետևանք նոր աշխատատեղերի ստեղծման, ներդրումների ներգրավման, տեղական արտադրության և արտահանման խթանման համար»,- գրված է երեք ընկերություններին տրամադրվող արտոնությունների մասին որոշման նախագծերում։