Մայիսի 14-ին կայանալիք Երևանի ավագանու ընտրություններին քվեարկելու իրավունք ունի 841 973 ընտրող։Քաղաքացիները ընտրելու են Երևանի քաղաքապետ և ավագանու անդամներ։

Ավագանու ընտրություններում մասնակցելու է երեք քաղաքական ուժ՝ «Ելք» դաշինքը և «Երկիր Ծիրանի», Հայաստանի հանրապետական կուսակցությունները։

«Ելք» դաշինք

Այս դաշինքի ցուցակը գլխավորում է ԱԺ պատգամավոր Նիկոլ Փաշինյանը։ Իսկ ցուցակը ընդգրկում է 63 անդամ՝ «Քաղաքացիական պայմանագիր», «Լուսավոր Հայաստան», «Հանրապետություն» կուսակցություններից, առաջադրվել են նաև  անկուսակցական թեկնածուներ։ Այս անգամ կրկին կպայքարեն ապրիլի 2-ի ընտրություններում քիչ ձայներ հավաքած թեկնածուները։

«Երկիր ծիրանի»

Կուսակցությունը արդարադատության նախարարությունում գրանցվել է ընդամենը մեկ շաբաթ առաջ։ Դրա ղեկավարը պատգամավոր Զարուհի Փոստանջյանն է, ով էլ ավագանու ընտրություններում գլխավորելու է ցուցակը։ Կուսակցությունը ավագանու ընտրություններում առաջադրել է 51 թեկնածուի, որից 29-ը կանայք են։ Ըստ ԿԸՀ ներկայացրած տվյալների՝ «Երկիր Ծիրանի»-իի բոլոր թեկնածուները աշխատում են, և հիմնականում գերակշռում են հումանիտար գիտությունների ներկայացուցիչները։

«Հայաստանի հանրապետական կուսակցություն»

ՀՀԿ-ն ամենաշատ թեկնածուներով է մասնակցելու ընտրությանը։ Այս կուսակցության թեկնածուների թիվը 195-ն է, որն ավելին է, քան մասնակցող մնացած երկու կուսակցությունների  թեկնածուների թիվը միասին։ Այս քաղաքական ուժի ցուցակը կրկին գլխավորելու է Երևանի քաղաքապետ Տարոն Մարգարյանը։ ՀՀԿ-ի կողմից առաջադրված թեկնածուների ցուցակում են նաև քաղաքապետի տեղակալները, մայրաքաղաքի բոլոր  վարչական շրջանների ղեկավարները, բացի Արաբակիրի ղեկավար Հովհաննես Վարդանյանից։ Կան նաև քաղաքապետարանի վարչությունների պետեր, դպրոցի տնօրեններ, արվեստագետներ և ավագանու անդամներ։

Երևանի ավագանու ընտրություններում դիտորդական առաքելություն է իրականացնելու միայն «Գեղամա երիտասարդական տարածքային ասոցիացիա»-ն՝ իր 147 դիտորդներով։ Հիշեցնենք, որ խորհրդարանական ընտրությունների ժամանակ գրանցվել էր թվով 28 021 դիտորդ՝ 49 տեղական հասարակական կազմակերպություններից։