Գայանե Սարգսյան

Վանաձոր համայնքի այսօր կայացած  ավագանու երկրորդ նիստը կրկին անցավ առանց «Լուսավոր Հայաստան», «Բարգավաճ Հայաստան» ու «Հայկական Վերածնունդ» կուսակցությունների խմբակցությունների ավագանու անդամների: Նիստին ներկա էին ՀՀԿ-ն ու ՀՅԴ-ն ներկայացնող թվով 15 ավագանու անդամները, ովքեր օրակարգային բոլոր հարցերին միաձայն կողմ քվեարկեցին:

Օրակարգային հարցերից մեկով ավագանու անդամները հաստատեցին համայնքային ենթակայությամբ գործող գրադարանների ու մարզադպրոցների աշխատողների հաստիքացուցակը: Նախկին 57.5 դրույքի փոխարեն համայնքային ենթակայության գրադարանային համակարգի աշխատանքը կապահովվի 21 դրույքով, ինչի արդյունքում այս տարվանից շուրջ 31.3 մլն դրամի պակաս կծախսվի նախորդ տարիների համեմատ:

Քաղաքապետի փոխանցմամբ՝ ուսումնասիություններն առաջիկայում շարունակվելու են նաև համայնքային ենթակայության մյուս հիմնարկություններում:

«Գրադարաններ են եղել, որտեղ  կա հաստիքային 4 աշխատող, բայց աշխատանքային սենյակում ընդամենը երկու աթոռ է եղել: Չեմ կարծում, որ մյուս երկուսը նստելու ցանկություն չեն ունեցել: Մեր ուսումնասիրությունները բերել են այն եզրահանգման, որ գրադարանների մեծ մասը իրենց ֆունկցիոնալ պարտականությունները չեն կատարել»,- ուսումնասիրության արդյուքները ներկայացրեց քաղաքապետ Մամիկոն Ասլանյանը:

Հաստիքացուցակի կրճատումներ են եղել նաև մարզադպրոցներում, որոնց արդյունքում համայնքային բյուջեում կխնայվի 23.7 մլն դրամ: Ընդհանուր առմամբ՝ գրադարանների ու մարզադպրոցների աշխատակիցների կրճատումների հաշվին  խնայված գումարը կկազմի 55 մլն դրամ:

Օրակարգային հաջորդ հարցով քաղաքապետարանի ծրագրերի ու արտաքին հարաբերությունների բաժնի պետ Լիլյա Դավթյանը ներկայացրեց համայնքի 2013-2016թթ.-երի քառամյա զարգացման ծրագրով 2016թ.-ին նախատեսված ու կատարված աշխատանքները: Նախատեսված, սակայն չկատարված աշխատանքների մասին բաժնի պետը հարկ չհամարեց զեկուցել, այն ամփոփելով մեկ նախադասությամբ՝ «այն ծրագրերը, որոնք չեն կատարվել, հիմնականում ֆինանսական միջոցների բացակայության պատճառով է եղել:

Ավագանու անդամ Արմեն Մատինյանը նկատեց՝ հաշվետվությունը գնահատելու համար լավ կլիներ նաև չարվածը ներկայացվեր: Բաժնի պետը ձեռքի տակ չիրականացված աշխատանքների փաթեթը չուներ: Այն գրավոր տարբերակով չէր տրամադրվել նաև ավագանու անդամներին:

Նիստի օրակարգային երկու հարցերով նախատեսված էր  ուժը կորցրած ճանաչել տեղական տուրքերի ու վճարների տեսակների դրույքաչափերին ու հողամասերի վարձավճարների չափերին վերաբերող 2017թ.-ի մարտի 31-ին ընդունված երկու որոշումներ ու սահմանել նոր դրույքաչփեր:

Քաղաքապետն առաջարկեց երկու հարցերը միավորել ու հարցը նոր խմբագրմամբ մտցնել օրակարգ: Ըստ քաղաքապետի՝ խոսքը վերաբերում է ոչ թե ինչպես նախագծում է նշված, «ուժը կորցրած ճանաչելուն, այլ որոշման մեջ լրամշակում կատարելուն»:

Ավագանին միաձայն հաստատեց  նաև այս երկու հարցերը: