Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ընդունել է քուվեյթցի գործարար Չարլզ Հայդերին։

Նախարարության կայքի համաձայն` Չարլզ Հայդերը ներկայացրել է ճանապարհաշինական ոլորտի գործունեության շրջանակները՝ նշելով, որ ճանապարհներ են կառուցել աշխարհի տարբեր երկրներում: Նրա խոսքով՝ դրանք որակապես բարձրակարգ են և երաշխավորված։

Պաշտոնական հաղորդագրության համաձայն` գործարարն ընդգծել է, որ հետաքրքրված է Հայաստանում իրականացվող ճանապարհաշինական նախագծերով, քանի որ դրանք մեծ պոտենցիալ ունեն:

Հանդիպման ընթացքում կողմերը մտքեր են փոխանակել համագործակցության հնարավոր ծրագրերի վերաբերյալ։

Նախարար Վահան Մարտիրոսյանն առաջարկել է ներդրումային ծրագրեր իրականացնել վճարովի ճանապարհների կառուցման գործում: Նա նաև հույս է հայտնել, որ հաջորդ տարվա համար հայտարարված ճանապարհաշինական մրցույթներին իրենց մասնակցությունը կունենան նաև քուվեյթցի շինարարները։