Նախորդ համարում «Դուշմանի փողե՞րն էին» վերտառությամբ հրապարակված հոդվածով ներկայացրել ենք Արարատի մարզպետարանում ՀՀ վերահսկիչ պալատի (ՎՊ) կատարած բացահայտումների մի մասը: Ուշագրավ է, որ ՎՊ-ն իր վերահսկողությունն իրականացրել է 2011 թ. հունվարի 11-ից հունիսի 30-ը ժամանակահատվածում, իսկ դրանից կարճ ժամանակ անց ՀՀ հատուկ քննչական ծառայությունը հայտնեց իր վարույթում քննվող քրեական գործով Արարատի նախկին մարզպետ Վարդգես Հովակիմյանին պաշտոնեական լիազորությունները չարաշահելու, պաշտոնեական կեղծիքի դրդելու և պաշտոնեական անփութության համար հուլիսի 19-ին մեղադրանք առաջադրելու մասին:

Այժմ դեռ չգիտենք, թե նշված քրեական գործը կապ ունի՞ ՎՊ-ի կամ դրանից ավելի վաղ Արարատի մարզպետարանի շինարարական ծրագրերի նկատմամբ իրականացված ստուգումներով ՀՀ ֆինանսների նախարարության ֆինանսական վերահսկողության տեսչության կատարած բացահայտումների հետ. դա կփորձենք պարզել առաջիկայում: Այնուամենայնիվ, եթե կապ ունի, ապա բացահայտված բազմաթիվ խախտումների, չարաշահումների համար միայն նախկին մարզպետին մեղադրանք առաջադրելը կարծում ենք, ոչ միայն սխալ է ու անարդարացի, այլև հիմք կարող է հանդիսանալ եզրակացնելու, որ նշված չարաշահումները, խախտումները կատարած այլ անձանց քրեական պատասխանատվությունից պրծացնելու միտում կա:

Անդրադառնանք ՎՊ-ի կատարած այլ բացահայտումների: «Արտաշատի բժշկական կենտրոն», «Վեդու բժշկական կենտրոն» և «Մասիսի բժշկական կենտրոն» ՓԲԸ-ների վերահսկողության ընթացքում արձանագրվել է 14522400 դրամի խախտում, որից 8262100 դրամը ենթակա է վերականգնման ՀՀ պետբյուջե, իսկ 6260300 դրամը` ընկերություններին:

Արարատի մարզի պետական 112 հանրակրթական ուսումնական հաստատություններից ընդամենը 16-ի նկատմամբ իրականացված վերահսկողությամբ հայտնաբերվել են բազմաթիվ ու տարաբնույթ խախտումներ, այդ թվում պարզվել է նաև, որ կատարվել է թվով 32 աշակերտի կրկնակի ֆինանսավորում` 1097200 դրամի չափով, որը, ըստ ՎՊ-ի, ենթակա է վերականգնման:

Ավելին, դպրոցներից 11-ում կատարվել է 4676900 դրամի անհիմն ծախս, որը նույնպես ենթակա է վերականգնման: Բացի դրանից` ուսումնասիրված դպրոցներում 2009-2010 թթ. գնումները կատարվել են առանց համապատասխան գնման գործընթաց իրականացնելու: Խախտվել են «Գնումների մասին» ՀՀ օրենքի պահանջները և ՀՀ կառավարության 2008 թ. հունիսի 5-ի թիվ 853-ն որոշմամբ սահմանված կարգի 3-րդ, 6-րդ և 7-րդ կետերի պահանջները:

Արարատի մարզում գործում է սոցիալական ծառայության տարածքային չորս գործակալություն` Արտաշատի, Մասիսի, Վեդու և Արարատի: Դրանցից առաջին երեքի վերահսկողության ընթացքում հայտնաբերվել են ընտանեկան նպաստի տրամադրման շուրջ 139 գործերի խախտումներ: Դրացից 34-ի պարագայում ընտանիքները կորցնում են նպաստի իրավունքը: Նշված խախտումների արդյունքում պետական բյուջեին պատճառված վնասի չափը, ըստ ՎՊ-ի, 9510500 դրամ է, որից ենթակա է վերականգնման 5446500 դրամը:

Վերահսկողութամբ պարզվել է նպաստառու ընտանիքների կողմից կենդանիների իրական թիվը թաքցնելու 11, հողերի իրական չափերը թաքցնելու 3, ընտանիքի կազմը սխալ ներկայացնելու 31 և ծածկագրերը ոչ ճիշտ կիրարկելու 4 դեպք: Նշված խախտումները հետևանք են նաև համայնքների ղեկավարների կողմից տրված սխալ տեղեկանքների, ինչպես նաև նշված գործակալությունների համապատասխան աշխատակիցների կողմից իրենց պարտականություններն այդ մասով չկատարելու:

Արթուր Հովհաննիսյան