Փարիզի քաղաքապետ Բերտրան Դելանոեի հրավերով Երևանի քաղաքապետ Կարեն Կարապետյանի գլխավորած պատվիրակությունը պաշտոնական այցով նախորդ 3 օրերին գտնվում էր Ֆրանսիայի Հանրապետության մայրաքաղաք Փարիզում:

Հայոց Ցեղասպանության հիշատակին նվիրված միջոցառումների շրջանակում քաղաքապետ Կարեն Կարապետյանը  ծաղկեպսակ է դրել Կոմիտասի հուշարձանին՝ ի հիշատակ նահատակների: Այնուհետև Փարիզի Աստվածամոր տաճարում Երևանի քաղաքապետը մասնակցել է զոհերի հիշատակին մատուցված պատարագին:

Պատվիրակությունը մասնակցել է  Փարիզի քաղաքապետարանում քաղաքապետ Բերտրան Դելանոեի կողմից կազմակերպված Հայոց Ցեղասպանության զոհերի հիշատակին նվիրված ընդունելությանը:

Իր հարգանքն ու երախտիքը հայտնելով ֆրանսիացի ժողովրդին ու ֆրանսիական պետությանը, Երևանի քաղաքապետ Կարեն Կարապետյանը նշել է , որ Փարիզի քաղաքապետարանում ավանդական դարձած այս ընդունելությունը խոսուն փաստ է և արտահայտում է այն բոլոր ջանքերը, որ ներդրվում են ի նպաստ հայ-ֆրանսիական դարավոր բարեկամության և հարաբերությունների  ամրապնդման:

Պատվիրակությունն  այցելել է նաև  Հայ առաքելական եկեղեցի և հանդիպել  Ֆրանսիայի թեմի առաջնորդ արքեպիսկոպոս Նորվան Զաքարյանի հետ:

Ապրիլի 26-ին Երևանի քաղաքապետը  հանդիպել է  Լիոնի քաղաքապետ Ժերար Կոլլոմբի հետ: Կարեն Կարապետյանը շնորհակալություն է հայտնել իր գործընկերոջը նախկինում կատարված և ներկայումս կատարվող համագործակցության ծրագրերի համար,  առաջարկել է  ավելի ակտիվացնել և գործնական հիմքի վրա դնել երկկողմ հարաբերությունները:  Կարևորելով երկու քաղաքների գործարար շրջանակների փոխգործակցությունը, Ժերար Կոլլոմբը պատրաստակամություն է հայտնել  կազմակերպել տրանսպորտի, մետրոյի կառավարման, աղբահանության ոլորտները ներկայացնող գործարարների խմբի այցը Երևան: Միաժամանակ, պայմանավորվածություն է ձեռք բերվել  մշակել համագործակցության կոնկրետ ուղղությունները` նոր եռամյա ծրագիրը ստորագրելու համար: Երևանի քաղաքապետը վերահաստատել է  Լիոնի քաղաքապետին Երևանում հյուրընկալելու իր հրավերը:

Կարեն Կարապետյանը հանդիպում է ունեցել  Իլ դը Ֆրանս շրջանային խորհրդի նախագահ Ժան-Պոլ Հյուշոնի և նախագահի տեղակալ Ֆիլիպ Կալտենբախի հետ, որին հաջորդել է «Երևան քաղաքի և Իլ դը Ֆրանս շրջանային խորհրդի միջև համագործակցության համաձայնագրի» ստորագրման արարողությունը:

Երկուստեք կարևորելով համաձայնագրի նշանակությունը, կողմերը նշել են, որ այն  նոր լիցքեր կհաղորդի բարեկամական համագործակցության ու հայ-ֆրանսիական գործնական  երկխոսության համար:

Կարևորելով երկկողմ  կապերի ակտիվացումն ու խորացումը, Կարեն Կարապետյանը հույս է հայտնել, որ հարաբերությունների զարգացումը թույլ կտա փոխշահավետ ծրագրեր իրականացնել`  ամրապնդելով և ավելի ծանրակշիռ հիմքերի վրա դնելով գործակցությունը:

Ֆրանսիական կողմը պատրաստակամություն է հայտնել  փորձագետների խումբ ուղարկել Երևան` համագործակցության ուղղությունները հստակեցնելու և կոնկրետ ծրագիր իրականացնելու համար:

Երևանի քաղաքապետ Կարեն Կարապետյանի և Փարիզի քաղաքապետ, Ֆրանսախոս քաղաքապետերի միջազգային ասոցիացիայի նախագահ Բերտրան Դելանոեի հանդիպման ընթացքում  քննարկվել են հոկտեմբերի 24-27-ը Երևանում կայանալիք Ֆրանսախոս քաղաքապետերի միջազգային ասոցիացիայի 31-րդ գլխավոր գագաթաժողովի անցկացման նախապատրաստական աշխատանքների հետ կապված հարցեր: 

Կարեն Կարապետյանն առաջարկել է  ակտիվացնել գործարար շփումները, նշելով, որ  Երևանը բաց է ներդրումների համար.  «Հրավիրում ենք ներդրումներ կատարել քաղաքային տնտեսության այն ոլորտներում, որոնց կառավարման արդյունավետ, ձևավորված մշակույթ կա: Մենք պատրաստ ենք Երևանում Ֆրանսիայից ոչ պակաս հարմարավետ բիզնես միջավայր ստեղծել»,- ասել է Կարեն Կարապետյանը: Միաժամանակ, պայմանավորվածություն է ձեռք բերվել  համագործակցությունը նոր ձևաչափով շարունակելու վերաբերյալ:

Ապրիլի 27-ին  «ACCOR» ընկերության փոխնախագահ Քրիստիան Կարաոգլանյանի հետ ունեցած հանդիպման ընթացքում ստորագրվել է  մտադրությունների արձանագրություն, որով նախանշվում են  հյուրանոցային կառավարման հայտնի ընկերության` «ACCOR»-ի և Երևանի քաղաքապետարանի միջև համագործակցության շրջանակները` Երևանում հյուրանոցային տնտեսության ոլորտում ներդրումների բնագավառում:

Այցի ընթացքում տեղի են ունեցել  մի շարք հանդիպումներ ֆրանսահայ համայնքի,  ինչպես նաև գործարար շրջանակների ներկայացուցիչների հետ: Այս մասին հայտնում են Երևանի քաղաքապետարանի աշխատակազմի տեղեկատվության և հասարակայնության հետ կապերի վարչությունից: