Երկուշաբթի՝ դեկտեմբերի 12-ին` տեղական ժամանակով 19:25-ին, նախորդ օրվա չեղյալ հայտարարված Երեւան-Կիեւ չվերթի ուղեւորները հասել են Ուկրաինայի «Բորիսպոլ» օդանավակայան:

Կիրակի օրը նախատեսված (առավոտյան ժամը 08:00-ին) չվերթը չի կայացել, քանի որ Կիեւ-Երեւան թռիչքի ինքնաթիռը չի կարողացել վայրէջք կատարել «Զվարթնոց» օդանավակայանում: Երեւանում վատ եղանակային պայմանների պատճառով ինքնաթիռն ուղարկվել է սպասման օդանավակայան՝ Թբիլիսի:

Տեղի չունեցած վայրէջքից հետո՝ կիրակի առավոտյան, օդանավը երկրորդ անգամ է փորձել վայրէջք կատարել Երեւանում, սակայն վատ տեսանելիության պատճառով կրկին չի կարողացել իջնել:

Ժամը 19:00-ի սահմաններում «Զվարթնոց» օդանավակայանում սպասող ուղեւորներին ընկերությունն ապահովել է երկանգամյա սնունդով: Ուշ գիշերին, երբ վերջնական որոշում կայացվեց չվերթը երկուշաբթի տեղափոխելու, այն ուղեւորները, ովքեր գիշերակացի խնդիր ունեին, տեղափոխվել են քաղաքի հյուրանոցներ:

Երկուշաբթի օրը Կիեւից Երեւան է ուղարկվել օդանավ՝ ավելի մեծ հզորությամբ, որն էլ թե կիրակի (չեղյալ համարված) եւ թե երկուշաբթի (պլանավորված) օրերի չվերթների ուղեւորներին հասցրել է Ուկրաինայի մայրաքաղաք:

«Աերոսվիտ» ավիաընկերությունը ներողություն է հայցում ուղեւորներից պատճառված անհարմարության համար:

Ցավոք, Կիեւ-Երեւան 11.12.2011 թ. թռիչքի՝ Թբիլիսիում մնալու, հետաձգվելու կամ չեղյալ համարվելու մասին դժվարացել ենք տեղեկատվություն տրամադրել «Զվարթնոցում» սպասող ուղեւորներին: Ավիաընկերությունը հավելյալ կպարզի օդանավի՝ Թբիլիսիում երկարատեւ կայանման պատճառները:

«Աերոսվիտ» ընկերություն