Թիվ 7 տարածքային ընտրական հանձնաժողովը, 7/51 և 7/53 ընտրատեղամասերում իրականացնելով քվեարկության արդյունքների վերահաշվարկի աշխատանքներ, որոշում է կայացրել 7/53-ին առնչվող նյութերն ուղարկել դատախազություն: Այս մասին «Հետք»-ին հայտնեց Կենտրոնական ընտրական հանձնաժողովի հասարակայնության հետ կապերի պատասխանատու Հերմինե Հարությունյանը։

«Ըստ Ընտրական օրենսգրքի կանոնակարգման՝ եթե դիմումի քննարկման արդյունքով տարածքային ընտրական հանձնաժողովը հանգում է այն եզրակացության, որ քվեարկության ընթացքում տեղի են ունեցել Ընտրական օրենսգրքի պահանջների այնպիսի խախտումներ, որոնք կարող էին էապես ազդել քվեարկության արդյունքների վրա, և եթե հնարավոր չէ պարզել քվեարկության իրական արդյունքները, ապա տարածքային ընտրական հանձնաժողովն այդ ընտրական տեղամասում քվեարկության արդյունքներն անվավեր է ճանաչում: Այդ դեպքում նյութերն ուղարկվում են դատախազություն»,-ասաց Հերմինե Հարությունյանը։

Հիշեցնենք՝ մայիսի 16-ին 7/51 և 7/53  ընտրատեղամասերում «ԵԼՔ» դաշինքի դիմումի հիման վրա վերահաշվարկ էր կայացել, և դաշինքի անդամները պնդել էին, որ անվավեր են ճանաչվել քվեաթերթիկներ, որոնք քվեարկվել են ցնդող գրիչով։ Նրանց կարծիքով՝ քվեախցերից մի քանիսում որոշ ժամանակ դրվել են ցնդող գրիչներ։