Մենք, ներքոստորագրյալներս, 

վկայակոչելով Գործընկերության և համագործակցության համաձայնագրի և Եվրոպական հարևանության քաղաքականության շրջանակներում համագործակցության բոլոր հնարավորությունները օգտագործելու ընդհանուր ձգտումը,

վերահաստատելով Արևելյան գործընկերության շրջանակներում ընդհանուր արժեքների հիման վրա հարաբերություններն ընդլայնելու և խորացնելու հանձնառությունը, ինչպես նաև Ասոցացման համաձայնագրի հեռանկարը, որը մեր հարաբերությունները գալիք տարիներին կբարձրացնի մեկ այլ մակարդակի,

նկատի ունենալով վերջին տարիներին Հայաստանի Հանրապետության և Եվրոպական Միության միջև քաղաքական ընդլայնված երկխոսությունը,

ողջունելով Հայաստանի Հանրապետության և Եվրոպական Միության միջև աճող համագործակցությունը, որը ներառում է հարցերի ավելի լայն շրջանակ, ներառյալ քաղաքական և մարդու իրավունքների շուրջ երկխոսությունը, արդարադատությունը, ազատությունը և անվտանգությունը, ինչպես նաև տնտեսական և ոլորտային քաղաքականությունը,

նկատի առնելով Եվրոպական հարևանության քաղաքականության գործողությունների ծրագրի իրականացման գործում Հայաստանի Հանրապետության արձանագրած առաջընթացը և նշելով բարեփոխումներին ուղղված Հայաստանի Հանրապետության կառավարության հետագա ջանքերի անհրաժեշտությունը,

ողջունում ենք ԵՄ-Հայաստան Ասոցացման համաձայնագրի բանակցություններում գրանցված լավ առաջընթացը և շեշտում ապագա Ասոցացման համաձայնագրի շրջանակում երկկողմ` Խորը և համապարփակ ազատ առևտրի գոտի հիմնելու շուրջ բանակցությունների մեկնարկի համար անհրաժեշտ պայմանների ապահովմանը ուղղված` Հայաստանի Հանրապետության հետագա քայլերի կարևորությունը,

ստանձնում ենք հանձնառություն` ավելի ակտիվորեն հետամուտ լինել Եվրոպական հարևանության քաղաքական ուղենիշներին, ինչը կամրագրվի Հայաստանի Հանրապետության կառավարության և Եվրոպական Հանձնաժողովի կողմից համատեղ մշակվելիք` բարեփոխումներին միտված գործընկերության շրջանակներում: Դրանք կուրվագծեն համագործակցության այն ոլորտները, որոնք կարող են լինել մեր հարաբերությունների կիզակետում` ԵՄ գործիքների և միջոցների օգնությամբ, 

վերահաստատում ենք Հայաստանի Հանրապետության հստակ հանձնառությունը շարունակելու բարեփոխումների գործընթացը և ընդգծում Եվրոպական Հանձնաժողովի պատրաստակամությունը տրամադրելու ավելի մեծ աջակցություն բարեփոխումների իրականացման համար, ներառյալ բյուջետային աջակցության և Հայաստանի Հանրապետության կառավարության և Եվրոպական Հանձնաժողովի միջև համաձայնեցված` Պետական կառավարման մարմինների զարգացման համապարփակ ծրագրի միջոցով, 

ողջունում ենք Հայաստանի Հանրապետությունում ԵՄ խորհրդատվական խմբի գործունեությունը` ապագա Ասոցացման համաձայնագրի առանցքային ոլորտներում խորհրդատվություն տրամադրելու գործում,

հայտնում ենք վստահություն, որ Հայաստանի Հանրապետության և Եվրոպական Միության միջև մարդկանց տեղաշարժին նպաստելը, ներառյալ Հայաստանի Հանրապետության և Եվրոպական Միության միջև վիզաների տրամադրման դյուրացման և հետընդունման համաձայնագրերի շուրջ բանակցությունների արագ մեկնարկը, լինելով անվտանգ միջավայրում վիզաների աստիճանական, հեռանկարային ազատականացման նպատակին ուղղված առաջին քայլերից մեկը, էականորեն կխթանի միջմարդկային շփումները:
 

Հայաստանի Հանրապետության կառավարության կողմից՝
Էդվարդ Նալբանդյան
Արտաքին գործերի նախարար

Եվրոպական Հանձնաժողովի կողմից՝ 
Շտեֆան Ֆյուլե
Եվրոպական հանձնաժողովի անդամ