Արդարադատության նախարարությունից տեղեկացնում են, որ նախարարի տեղակալ Վիգեն Քոչարյանի համանախագահությամբ մայիսի 30-ին Բրյուսելում տեղի է ունեցել Արդարադատության, ազատության և անվտանգության ոլորտում համագործակցության հարցերով ԵՄ-ՀՀ ենթակոմիտեի նիստը։

Հայաստանի միջգերատեսչական պատվիրակության կազմում ընդգրկված են եղել արտաքին գործերի նախարարության, ոստիկանության, գլխավոր դատախազության, կենտրոնական բանկի և Միգրացիոն պետական ծառայության ներկայացուցիչները։

Բացելով նիստը՝ ՀՀ պատվիրակության ղեկավար, նախարարի տեղակալ Վիգեն Քոչարյանը կարևորել է ՀՀ-ԵՄ միջև երկխոսության և տարբեր ոլորտներում առկա համագործակցության զարգացումը: Արձանագրելով, որ արդարադատության, ազատության և անվտանգության հարցերը հանդիսանում են այդպիսի համագործակցության առանցքային ոլորտներից մեկը, նա նշել է, որ դա նաև արտացոլվել է ԵՄ-ՀՀ համագործակցության իրավական հիմքը սահմանող հիմնարար պայմանագրի նախագծում:

ԵՄ-ՀՀ ենթակոմիտեի նիստում բազմակողմանի քննարկման առարկա է դարձել երկկողմանի համագործակցությունը այնպիսի ոլորտներում, ինչպիսիք են՝ դատաիրավական բարեփոխումները, իրավական փոխօգնությունը քրեական գործերով, միգրացիան և սահմանային անվտանգության ապահովումը, վիզային ռեժիմի դյուրացումը և հետընդունման համաձայնագրերի կատարումը, կազմակերպված հանցավորության դեմ պայքարը, այդ թվում՝ մարդկանց թրաֆիքինգի և շահագործման, ահաբեկչության, թմրանյութերի անօրինական շրջանառության, փողերի լվացման դեմ պայքարը, հակակոռուպցիոն քաղաքականության իրագործումը և այլ հարցեր։

Ամփոփելով արդարադատության, ազատության և անվտանգության հարցերով ԵՄ-ՀՀ ենթակոմիտեի աշխատանքները՝ կողմերը դրական են գնահատել առկա համագործակցության մակարդակը և ընդգծել  համատեղ նախագծերի և ապագա գործողությունների կարևորությունը։