Նյութի աղբյուր՝ Ասպարեզ

Ավագանու նիստը չեն տարբերում հանձնաժողովի նիստից

«Տեղական ինքնակառավարման մասին» ՀՀ օրենքի 13-րդ հոդվածի 5-րդ կետը սահմանում է. «Մինչեւ ավագանու 9 անդամ ունեցող համայնքներում ավագանին իրեն վերապահված լիազորությունների իրականացման համար կարող է իր որոշմամբ ստեղծել մշտական գործող կամ ժամանակավոր հանձնաժողովներ»:
Նույն հոդվածի 6-րդ կետով սահմանվում է. «Ավագանու 9 եւ ավելի անդամ ունեցող համայնքում ավագանին իրեն վերապահված լիազորությունների իրականացման համար ստեղծում է մշտական, իսկ անհրաժեշտություն առաջանալու դեպքում՝ ժամանակավոր հանձնաժողովներ»:
Գյումրու ավագանին նախորդ տարվա նոյեմբերի 23-ին հաստատեց համայնքի ավագանու մշտական գործող թվով 4 հանձնաժողովների կազմերը:

Հանձնաժողովներում խմբակցություններին տեղեր են հատկացվում նրանց խմբակցության անդամների թվաքանակի համամասնությամբ. խմբակցության նիստում խմբակցության անդամները որոշում են իրենց մասնակցությունը ավագանու հանձնաժողովներին, որի համաձայն խմբակցության ղեկավարը համայնքի ղեկավարին է ներկայացնում հանձնաժողովներից յուրաքանչյուրում ընդգրկվելիք խմբակցության անդամների անուն-ազգանունները:

Մյուս խմբակցությունները՝ ԲՀԿ, ԳԱԼԱ, ՀՎԿ, դեռեւս բոյկոտում են ավագանու նիստերը եւ հանձնաժողովներում անդամներ չունեն:
4 հանձնաժողովների կազմերի անդամներն ու նախագահները միայն «Բալասանյան» դաշինքից են:

Ֆինանսավարկային եւ տնտեսական հարցերի մշտական գործող հանձնաժողովի նախագահը ընտրվել եւ նշանակվել է Գյումրու քաղաքապետի քրոջ դուստրը՝ «Գյումրի-գարեջուր» ՍՊԸ արտաքին կապերի վարչության պետ Լուսինե Սանոյանը, ում հայրը՝ Ռուբիկ Սանոյանը, համայնքի ղեկավարի առաջին տեղակալն է:

Այս հանձնաժողովի անդամներն են՝ «Յունիբանկ» ՓԲԸ-ի վարկային մասնագետ Կարեն Միքայելյանը, «Ախուրյանի Կոոպշին» ՍՊԸ փոխտնօրեն Արմեն Տոնոյանը, «Համալիր մարզադպրոց» ՀՈԱԿ-ի քիմ.հականեխող Կարինե Թաթարյանը:

Մշակույթի, կրթության, սպորտի եւ սոցիալական հարցերի մշտական գործող հանձնաժողովի նախագահը Մխիթար Սահակյանն է, չի աշխատում: Այս հանձնաժողով են ընդգրկվել «Անդրանիկ» Ա/Կ տնօրեն Գրիգոր Գրիգորյանը, «ՀԷՑ» ՓԲԸ արհմկոմի նախագահ Լոլյա Խաչատրյանը, Վահան Հունանյանը, նա չի աշխատում:

Քաղաքաշինության եւ հողօգտագործման հարցերի մշտական գործող հանձնաժողովի նախագահը «Մերձմոսկովյան» ԲԲԸ-ի փոխտնօրեն Արտակ Ադամյանն է: Այս հանձնաժողովի անդամներն են՝ Վարդան Եդիգարյանը, չի աշխատում, Տիգրան Փանոսյանը, նա եւս չի աշխատում, «Գյումրի-գարեջուր» ՍՊԸ-ի հնեցման արտադրամասի բաժնի պետ Արամայիս Գրիգորյանը:

Իրավական հարցերի մշտական գործող հանձնաժողովի նախագահը Գյումրու թիվ 9 հիմնական դպրոցի կազմակերպիչ Գայանե Սարգսյանն է, անդամները՝ Գոռավետ» ՍՊԸ-ի տնօրեն Էդգար Մկրտչյանը, Շիրակի մարզի կրթության, մշակույթի եւ սպորտի վարչության պետ Հրայր Կարապետյանը, «Ռ.Տ.Թրեյդինգ» ՍՊԸ-ի տնօրեն Տիգրան Հովհաննիսյանը:

Հանձնաժողովներից յուրաքանչյուրի անդամների թվաքանակը հավասար է ավագանու անդամների ընդհանուր թվի շուրջ մեկ քառորդին: Համայնքի ղեկավարը եւ նրա առաջին տեղակալը հանձնաժողովների կազմում չեն ընդգրկվում:

Գյումրու ավագանու անդամներից փորձեցինք պարզել, թե իրենց մշտական հանձնաժողովների վերջին նիստերը երբ, որտեղ են կայացել: Ավագանու 16 անդամից միայն 6-ը պատասխանեց մեր զանգերին: Մյուսները կամ չէին պատասխանում հեռախոսազանգերին կամ փոխանցում էին, թե ավտոմեքենայի ղեկին են, հարմար չէ, կամ կարեւոր գործերով են զբաղված:

Ավագանու բոլոր 6 անդամներն էլ շփոթում էին, կարծելով, թե հանձնաժողովի ու ավագանու նիստերը նույնն են: Ապա մի քանի վայրկյան անց, հիշելով, ասում էին, թե հանձնաժողովի նիստերը կայացել են ապրիլի վերջին օրերին, սակայն նորից կոնկրետ օր չէին հիշում, նշում էին՝ ապրիլի 25, 26, 27:

Ավագանու կանոնակարգի համաձայն՝ հանձնաժողովների հերթական նիստերը նստաշրջանների ընթացքում հրավիրվում են ամիսը առնվազն մեկ անգամ՝ հանձնաժողովի սահմանած օրերին եւ ժամերին, իսկ նստաշրջանների միջակայքում՝ ըստ անհրաժեշտության: Ավագանու նիստի ընթացքում արգելվում է հանձնաժողովի նիստի գումարումը:

Հարցումներից պարզեցինք նաեւ, որ հանձնաժողովի նիստերը կայանում են քաղաքապետարանում, սակայն տարբեր աշխատասենյակներում: Օրինակ՝ մշտական հանձնաժողովների նիստերի համար աշխատասենյակ է տրամադրում աշխատակազմի քարտուղար Ռոբերտ Ասատրյանը, նաեւ համայնքի ղեկավարի խորհրդական Արարատ Բալաբեկյանը:

Գյումրու ավագանու կանոնակարգի համաձայն՝ հանձնաժողովի նիստերը տեղի են ունենալու ավագանու նստավայրում, այսինքն՝ քաղաքապետարանի վարչական շենքի 3-րդ հարկում, այստեղ է Գյումրու ավագանու նստավայրը:

Նույն կանոնակարգի համաձայն՝ այլ վայրում հանձնաժողովի նիստ կարող է անցկացվել միայն հանձնաժողովի որոշմամբ, որի մասին հանձնաժողովի նախագահը նախապես տեղեկացնում է համայնքի ղեկավարին: Մեր այն հարցին, թե այլ վայրերում հանձնաժողովի նիստ անցկացնելու մասին հանձնաժողովը որոշում կայացնո՞ւմ է, ավագանու անդամները չունեին պատասխան:

Այսպիսով, քաղաքապետարանի պաշտոնյաների աշխատասենյակները ժամանակավորապես զբաղեցրած մշտական հանձնաժողովները նաեւ փոխանցում են, որ նիստերին քննարկվող հարցերի շուրջ երբեմն տարաձայնություններ էլ են լինում, բայց միշտ ելքը գտնում են, ընդհանուր եզրակացության են գալիս: Նիստի արձանագրությունները, իրենց խոսքերով, մեկ-մեկ հանձնում են աշխատակազմի քարտուղարին ու խմբակցության նախագահին:

Ավագանու անդամներից մեկն էլ խոստացավ հանձնաժողովի նիստի կայացման օրվա ու ժամի մասին նախապես մեզ տեղեկացնել, որ ներկա գտնվենք նիստերին ու ավելի համոզիչ լինի:

Անի Մկրտչյան