Պետական եկամուտների կոմիտեն 163 միլիոն դրամ կհատկացնի Մեղրիի մաքսային կետի արդիականացման ծրագրի իրականացման համար։ Գործադիրի այսօրվա նիստին հավանության արժանացավ ՊԵԿ նախագահ Վարդան Հարությունյանի ներկայացրած որոշման այս նախագիծը։

Ինչպես գրված է նախագծում՝ դրա ընդունումը պայմանավորված է Միավորված ազգերի զարգացման ծրագրի (ՄԱԶԾ) կողմից Սյունիքի տարածաշրջանային մաքսատան Մեղրիի մաքսային կետի արդիականացման ծրագրի իրականացմամբ։ Ծրագրի նպատակն է միգրացիայի և սահմանային կառավարման ոլորտի մոտեցումը համապատասխանեցնել եվրոպական կառավարման չափանիշներին:

163 միլիոն դրամը կհատկացվի մաքսակետ տանող ավտոճանապարհի արտաքին լուսավորությունը արդիականացնելու համար: Դրանից մոտ 160-ը կնախատեսվի շինարարական աշխատանքների, մնացածը՝ տեխնիկական և հեղինակային հսկողության համար։