Կառավարությունը երեկ շատ առատաձեռն գտնվեց անապահով խավի հանդեպ՝ որպես Ամանորի նվեր աղքատության ընտանեկան նպաստի համակարգում հաշվառված 116 հազար ընտանիքներից յուրաքանչյուրին հատկացնելով երեք շիշ ձեթ: Այո, այո, ձեթ, այն էլ՝ արևածաղկի:

Այս որոշումն ընդունվեց կառավարության նիստում, վարչապետ Տիգրան Սարգսյանն էլ սա շատ կարևոր նախաձեռնություն համարեց՝ օրը ցերեկով ծաղրելով անապահով խավին: Վարչապետը խոստացավ, որ կառավարության աջակցությունն անապահով խավին շարունակական կլինի, նպաստներն ու թոշակներն էլ հաջորդ տարվանից 10-ական տոկոսով կբարձրանան:

«Նոր տարվա կապակցությամբ համապատասխան արևածաղկի ձեթ ունեինք պահեստավորված, վարչապետի հետ համաձայնություն ձեռք բերեցինք, որպեսզի դա հատկացվի անապահով ընտանիքներին»,- կառավարության նիստից հետո լրագրողներին ասաց աշխատանքի և սոցիալական հարցերի նախարար Արթուր Գրիգորյանը: Միաժամանակ նա նշեց, որ այդ ընտանիքներն այլ օժանդակության կարիք էլ ունեն, և սխալ կլինի ասել, թե միայն ձեթով կբավարարվեն:

Բայց զարմանալի է՝ այս ձեթը սոցապ նախարարն էլ կարող էր սուսուփուս բաժանել, ինչո՞ւ է վարչապետը այսքան կարևորում այս «անկարևորությունը»: