Սկիզբը

ՕՐԻՆԱԳԾՈՎ ՆԵՐԿԱՅԱՑՎԱԾ ԴՐՈՒՅԹՆԵՐ

Հոդված 4. Օրենքի 6-րդ հոդվածը շարադրել հետեւյալ խմբագրությամբ.

«Հոդված 6. ՆԱԽԱՏԵUՎՈՂ ԳՈՐԾՈՒՆԵՈՒԹՅԱՆ ՓՈՐՁԱՔՆՆՈՒԹՅԱՆ ՓՈՒԼԵՐԸ ԵՎ ԺԱՄԿԵՏՆԵՐԸ

2. Փորձաքննության նախնական փուլն իրականացվում է ձեռնարկողի կողմից ծանուցումը  լիազոր պետական մարմնին ներկայացնելու օրվանից` 30 օրյա ժամկետում:

5. Փորձաքննության հիմնական փուլի ժամկետները չպետք է գերազանցեն`

1)  նախատեսվող գործունեության “Ա” կատեգորիայի դեպքում` 60 աշխատանքային օրը.

2) նախատեսվող գործունեության “Բ” կատեգորիայի դեպքում` 40 աշխատանքային օրը.

ԱՌԱՋԱՐԿՈՒԹՅՈՒՆ

Հոդվածի դրույթները խմբագրել հետեւյալ կերպ`

2. Փորձաքննության նախնական փուլն իրականացվում է ձեռնարկողի կողմից ծանուցումը  լիազոր պետական մարմնին ներկայացնելու օրվանից` 50 օրյա ժամկետում:

5. Փորձաքննության հիմնական փուլի ժամկետները չպետք է գերազանցեն`

1)  նախատեսվող գործունեության “Ա” կատեգորիայի դեպքում` 80 աշխատանքային օրը.

2) նախատեսվող գործունեության “Բ” կատեգորիայի դեպքում` 60 աշխատանքային օրը.

ՕՐԻՆԱԳԾՈՎ ՆԵՐԿԱՅԱՑՎԱԾ ԴՐՈՒՅԹՆԵՐ

ՀՈԴՎԱԾ 5. Oրենք լրացնել հետեւյալ բովանդակությամբ նոր  6.1-րդ հոդվածով.

«Հոդված 6.1. Նախատեսվող գործունեության իրականացման ծանուցման կարգը

ԱՌԱՋԱՐԿՈՒԹՅՈՒՆ

Հոդված 5-ի 2-րդ կետում ավելացնել նոր ենթակետ` հետեւյալ բովանդակությամբ`

8) նախատեսվող գործունեության այլընտրանքային տարբերակները եւ ընտրված տարբերակի հիմնավորումները

Հոդված 5-ի 5-րդ, 6-րդ եւ 7-րդ կետերը խմբագրել հետեւյալ կերպ`

5. Ձեռնարկողը եւ ազդեցության ենթարկվող համայնքի ղեկավարը, սույն հոդվածի 3-րդ մասով սահմանված տեղեկությունը լիազորված մարմնից ստանալուց հետո 3 օրվա ընթացքում զանգվածային լրատվական միջոցներով տեղեկություններ են հաղորդում նախատեսվող գործունեության մասին, միաժամանակ նշելով հանրային լսումների անցկացման, ինչպես նաեւ առաջարկություններ եւ առարկությունների ներկայացման վայրը եւ վերջնաժամկետը: Նախատեսվող գործունեության եւ շրջակա միջավայրի վրա դրա ազդեցության վերաբերյալ հասարակայնությունից կարծիքներ ստանալու նպատակով  ազդեցության ենթարկվող համայնքի ղեկավարը եւ ձեռնարկողը անցկացնել հասարակական լսում` լրատվական միջոցներով տեղեկություններ են հաղորդելուց հետո 15 օրվա ընթացքում:

Այն դեպքերում, երբ բաց է թողնվել հանրային լսումների փուլը կամ չեն կատարվել հանրային լսումներին հասարակության մասնակցության եւ բնապահպանական օրենսդրությամբ սահմանված այլ պահանջները, նախատեսվող գործունեության համար փաստաթղթերը չեն կարող ներկայացվել փորձաքննության:

6. Շահագրռիռ հասարակայնությունը, նախատեսվող գործունեության մասին տեղեկատվության ծանուցման օրվանից հետո 15 օրվա ընթացքում,  էլեկտրոնային կամ գրավոր կարծիքը տրամադրում է  ազդեցության ենթարկվող համայնքի ղեկավարին կամ լիազորված մարմնին: Հանրային լսումների արդյունքում նախատեսվող գործունեության թույլատրելու կամ չթույլատրելու վերաբերյալ ազդակիր համայնքի կայացրած որոշումը համայնքի ղեկավարը 3 օրվա ընթացքում տրամադրում է լիազոր մարմնին: Ազդեցության ենթարկվող համայնքում նախատեսվող գործունեության վերաբերյալ հանրային լսումների անցկացումը եւ կարծիքի արձանագրումը պարտադիր է բոլոր կատեգորիաների համար:

Շահագրգիռ հասարակայնության կողմից 15 օրվա ընթացքում ազդեցության ենթարկվող համայնքի ղեկավարին կամ լիազորված մարմնին կարծիքներ չտրամադրելու դեպքում` հասարակայնության կարծիքը համարվում է դրական: Համայնքի ղեկավարը պարտավոր է հասարակական լսումների արդյունքում շահագրգիռ հասարակության կարծիքները եւ/կամ ազդակիր համայնքի կարծիքն արտահայտող արձանագրությունը 3 աշխատանքային oրվա ընթացքում ուղարկել լիազոր մարմնին:

Հասարակական լսումներ չկազմակերպելու եւ/կամ դրա արդյունքում արտահայտված կարծիքները կամ արձանագրությունը օրենքով սահմանված կարգով լիազոր մարմնին չուղարկելու դեպքում շահագրգիռ հասարակության եւ/կամ ազդակիր համայնքի կարծիքը համարվում է բացասական:

7.  Ազդեցության ենթարկվող համայնքի ղեկավարը շահագրգիռ հասարակության կարծիքների ստացման համար սահմանված ժամկետի ավարտից եւ/կամ ազդեցության ենթարկվող համայնքի կարծիքն արտահայտող արձանագրությունը ստանալուց հետո 3 օրյա ժամկետում իր էլեկտրոնային կամ գրավոր կարծիքը եւ հասարակայնությունից ստացված կարծիքների պատճենները տրամադրում է լիազորված մարմնին եւ ձեռնարկողին:

Եթե, ազդեցության ենթարկվող համայնքի կողմից, շրջակա միջավայրի վրա վնասակար ազդեցությանը վերաբերող հիմնավորումներով տրվել է բացասական կարծիք իր տարածքում տվյալ նախատեսվող գործունեության իրականացման վերաբերյալ, ապա այն հիմք է հանդիսանում փոձաքննության նախնական փուլի դադարեցման համար:

8. Ազդեցության ենթարկվող համայնքի եւ հասարակայնության համար սույն հոդվածով սահմանված ժամկետների ավարտից հետո 5-օրյա ժամկետում, իսկ ազդեցության ենթարկվող երկրի վրա հնարավոր անդրսահմանային ազդեցության առկայության դեպքում սույն օրենքի 13.2-րդ հոդվածով սահմանված ժամկետում լիազորված մարմինն իր կատարած ուսումնասիրությունների եւ ստացված կարծիքների հիման վրա կայացնում է հետեւյալ որոշումներից մեկը.

1) նախատեսվող գործունեության իրականացումն անթույլատրելի է, որը կայացվում է հիմք ընդունելով Հայաստանի Հանրապետության օրենքներով սահմանված բնապահպանական սահմանափակումները, ինչպես նաեւ ազդեցության ենթարկվող համայնքի կարծիքն արտահայտող արձանագրությունը.

2) նախատեսվող գործունեությունը ենթակա է հիմնական փուլի փորձաքննության,  որը կայացվում է հիմք ընդունելով նաեւ ազդեցության ենթարկվող համայնքի կարծիքն արտահայտող արձանագրությունը.  այս դեպքում ձեռնարկողին է տրվում տեխնիկական առաջադրանք, որը ներառում է գնահատման անհրաժեշտ ծավալը, առաջադրանքները ուսումնասիրության ենթակա խնդիրները, նախատեսվող գործունեության հնարավոր ազդեցության ենթակա տարածքի նկարագրման պահանջը, հոդված 7-ով սահմանված հաշվետվության բովանդակությունն ըստ սույն օրենքի 4-րդ հոդվածով սահմանված նախատեսվող գործունեությունների կատեգորիաների եւ լրացուցիչ հասարակական լսումներ անցկացնելու պահանջը: Տեխնիկական առաջադրանքը կազմվում է հաշվի առնելով փորձաքննության նախնական փուլում ուսումնասիրված ծանուցման վերաբերյալ առաջարկություններն ու դիտողությունները: Տեխնիկական առաջադրանքի ուղեցույցը սահմանվում է սույն օրենքով:

3) նախնական փուլում տրամադրվում է փորձաքննական եզրակացություն` սույն օրենքի 4-րդ հոդվածի 4-րդ մասով սահմանված «Գ» կատեգորիայում ներառված նախատեսվող գործունեություններին:

Նախնական փուլում տրամադրված փորձաքննական եզրակացությամբ շրջակա միջավայրին հասցված նյութական վնասի ռիսկը կրում են լիազոր մարմնի իրավասու պաշտոնատար անձիք:

4) նախատեսվող գործունեությունը ենթակա է անդրսահմանային ազդեցության գնահատման, այս դեպքում տեխնիկական առաջադրանք կարող է չմշակվել, եւ փաստաթղթերի ծավալն ու բովանդակությունը, ուսումնասիրության ենթակա խնդիրներն ու գնահատման անհրաժեշտ ծավալը կարող են որոշվել լիազորված մարմնի, համապատասխան պետական կառավարման մարմնի եւ ձեռնարկողի հետ էլեկտրոնային կամ գրավոր համաձայնեցնելով:

ԱՌԱՋԱՐԿՈՒԹՅՈՒՆ

Օրենքի 2-րդ գլուխը (Շրջակա միջավայրի վրա նախատեսվող գործունեության ազդեցության փորձաքննությունը) լրացնել նոր հոդվածով` 6.2` հետեւյալ բովանդակությամբ`

6.2 Հասարակական լսումների անցկացման կարգը

ՀԻՄՆԱՎՈՐՈՒՄ

Օրենքի նախագիծը դրույթներ է պարունակում ձեռնարկողի և փորձագետների իրավունքների մասին, սակայն հասարակայնության իրավունքներն ու դերը հստակ սահմանված չեն: Օրինագծի իմաստով, հասարակայնությունը պետք է ծանուցվի նախատեսվող գործունեության մասին, պետք է ապահովվի նրա մասնակցի հասարակական լսումներին, սակայն նախնական եւ հիմնական փուլերում այդ մասնակցությունը հիմնականում կրում է ձեւվական բնույթ, քանի որ հասարակության մասնակցությունը սահմանափակվում է «փաստաթղթերի հետ ծանոթանալու կամ դրանց մասին տեղեկատվություն ստանալու, ինչպես նաեւ դրանց վերաբերյալ առաջարկություններ եւ առարկություններ ներկայացնելու» իրավունքով: Այսինքն, հասարակությունն ըստ էության չի մասնակցում «որոշումների կայացման» գործընթացին եւ կարող է ընդամենը կարծիք հայտնել, ինչը չի բխում Օրհուսի կոնվենցիայի պահանջներից:

Օրինագծով ներկայացված իրավակարգավորմամբ, հասարակայնության մասնակցությունը սկսվում է տեխնիկական առաջադրանքը կազմելուց հետո միայն։ Օրինագծի համաձայն` «Ձեռնարկողը եւ ազդեցության ենթարկվող համայնքի ղեկավարը ... զանգվածային լրատվական միջոցներով տեղեկություններ են հաղորդում նախատեսվող գործունեության մասին, միաժամանակ նշելով դրա վերաբերյալ կարծիքների (առաջարկություններ եւ առարկությունների) ներկայացման վայրը եւ վերջնաժամկետը: Լրացուցիչ տեղեկատվության տրամադրման եւ հասարակայնությունից կարծիքներ ստանալու նպատակով ազդեցության ենթարկվող համայնքի ղեկավարը եւ ձեռնարկողը կարող են անցկացնել հասարակական լսում եւ տրամադրել խորհրդատվություն»: Պետք է սահմանել հասարակայնության ծանուցման և քննարկումների անցկացման մանրամասն ընթացակարգ: Օրինագծով նախատեսված չէ նախատեսվող գործունեության վերաբերյալ որոշումները հասարակայնության կողմից բողոքարկման հնարավորություն, ինչն անթույլատրելի է Օրհուսի կոնվենցիայի իմաստով։

Անհրաժեշտ է առանձին ընթացակարգով մշակել տեղեկատվություն ստանալու, որոշումների կայացմանը մասնակցելու եւ արդարադատության մատչելիության (որոշումները բողոքարկելու) հստակ մեխանիզմներ` Օրհուսի կոնվենցիայի շրջանակներում:

ՕՐԻՆԱԳԾՈՎ ՆԵՐԿԱՅԱՑՎԱԾ ԴՐՈՒՅԹՆԵՐ

ՀՈԴՎԱԾ 6. Oրենքի 7-րդ հոդվածը շարադրել հետեւյալ խմբագրությամբ.

«ՀՈԴՎԱԾ 7. ՓՈՐՁԱՔՆՆՈՒԹՅԱՆ ՀԱՄԱՐ ԱՆՀՐԱԺԵՇՏ ՓԱUՏԱԹՂԹԵՐԸ  ԵՎ ՀԱՇՎԵՏՎՈՒԹՅԱՆ ԲՈՎԱՆԴԱԿՈՒԹՅՈՒՆԸ

ԱՌԱՋԱՐԿՈՒԹՅՈՒՆ

Օրենքի նախագծի 6-րդ հոդված-ի 2-րդ եւ 4-րդ կետերը խմբագրել հետեւյալ կերպ`

2. Փորձաքննության համար անհրաժեշտ փաuտաթղթերն են`

1) նախատեսվող գործունեության նախագծային փաստաթուղթը.

2) ազդեցության ենթարկվող համայնքի կարծիքն արտահայտող արձանագրությունը.

3) շահագրգիռ հասարակայնության մասնակցությանը վերաբերող փաստաթղթերը (ծանուցման հրապարակման պատճենը, ստացված դիտողություններն ու առաջարկությունները).

4. Հաշվետվությունը կազմվում է հաշվի առնելով ծանուցման գործընթացի մասնակիցների կողմից ներկայացված եզրակացությունները, ազդեցության ենթարկվող համայնքի կարծիքն արտահայտող արձանագրությունը եւ շահագրգիռ հասարակության կարծիքները: Շահագրգիռ հասարակության կարծիքները հաշվի չառնելու դեպքում ձեռնարկողը հաշվետվությունում ներկայացնում է հիմնավոր պատճառաբանումներ:

(Եթե  նախագծային փաստաթղթերը պարունակում են սույն հոդվածի  3-րդ մասով սահմանված կետերին համապատասխանող բաժիններ, ապա դրանք կարող են չներառվել հաշվետվությունում` դրանց մասին հղումներ կատարելու պայմանով: Այս մասը առաջարկվում է օրինագծից հանել )

ՕՐԻՆԱԳԾՈՎ ՆԵՐԿԱՅԱՑՎԱԾ ԴՐՈՒՅԹՆԵՐ

ՀՈԴՎԱԾ 7. Oրենքի 8-րդ հոդվածում`

Հոդված 8.

Փորձաքննությանը ենթակա փաստաթղթերի հրապարակումը և քննարկումը

ԱՌԱՋԱՐԿՈՒԹՅՈՒՆ

Օրենքի նախագծի 7-րդ հոդվածը խմբագրել հետեւյալ կերպ`

1. Փաստաթղթերը ստանալուց հետո լիազոր պետական մարմինը դրանց օրինակները ոչ ավել, քան 5 աշխատանքային օրվա ընթացքում տրամադրում է տվյալ մարզի կամ ազդեցության ենթարկվող համայնքի ղեկավարներին, համապատասխան պետական մարմնին եւ մասնագիտական փորձաքննական եզրակացություն կազմելու իրավասություն ունեցող լիազորված անձանց (այսուհետ` լիազորված անձանց):

Ազդեցության ենթարկվող համայնքի ղեկավարը փաստաթղթերի օրինակները ստանալու օրվանից ոչ ուշ, քան երեք աշխատանքային օրվա ընթացքում զանգվածային լրատվական միջոցներով տեղեկացնում է փաստաթղթերի հետ ծանոթանալու կամ դրանց մասին տեղեկատվություն ստանալու, ինչպես նաեւ դրանց վերաբերյալ առաջարկություններ եւ առարկություններ ներկայացնելու ու հասարակական լսումներ անցկացնելու տեղի եւ ժամկետների մասին:

1.1 Հնարավոր անդրսահմանային ազդեցության դեպքում, եթե լիազոր պետական մարմինը ազդեցության ենթարկվող երկրից պատասխան է ստացել նախատեսվող գործունեության ազդեցության գնահատմանը մասնակցելու մտադրության մասին, ապա լիազոր պետական մարմինն ազդեցության ենթարկվող երկիր է ներկայացնում շրջակա միջավայրի վրա ազդեցության հաշվետվության մեկ օրինակը եւ սույն օրենքի 13.2-րդ հոդվածով սահմանված կարգով տեղեկացնում դրա վերաբերյալ առաջարկություններ եւ առարկություններ ներկայացնելու ժամկետների մասին:

2. Լիազոր պետական մարմինը, ազդակիր համայնքի ղեկավարները եւ ձեռնարկողը սույն հոդվածի 1-ին մասի համաձայն լրատվական միջոցներով տեղեկացնելուց հետո սույն օրենքի 4-րդ հոդվածով սահմանված նախատեսվող գործունեությունների «Ա» կատեգորիայի համար` 30,  «Բ»” կատեգորիայի համար` 20 օրացուցային օրվա ընթացքում կազմակերպում ու ապահովում են հասարակայնության կողմից փաստաթղթերի ուսումնասիրությունը եւ լսումները: Շահագրգիռ հասարակայնության կարծիքը նշված ժամանակամիջոցում ներկայացվում է ազդակիր համայնքի ղեկավարներին կամ անմիջապես լիազոր պետական մարմնին: Ազդակիր համայնքի կարծիքն արտահայտող արձանագրությունը համայնքի ղեկավարը ներկայացնում է լիազոր մարմնին:

Սույն մասով սահմանված ժամկետները լիազոր պետական մարմինը կարող է երկարաձգել օրենքի 6-րդ  հոդվածի 6-րդ մասով սահմանված կարգով եւ ժամկետներով:

Նախատեսվող գործունեության «Ա» կատեգորիայի համար եւ հնարավոր անդրսահմանային ազդեցություն ունեցող նախատեսվող գործունեության դեպքում հասարակական լսումներն անցկացվում են լրատվական միջոցներով տեղեկատվությունը հրատարակելուց հետո` 20 օրացուցային օրվանից ոչ շուտ:

Եթե ազդակիր համայնքի թիվը մեկից ավելի է, հասարակական լսումների վայրը որոշում է լիազոր պետական մարմինը:

3. Սույն հոդվածի 2-րդ մասով սահմանված ժամկետները լրանալուց հետո 3 աշխատանքային օրվա ընթացքում ազդակիր համայնքների ղեկավարները շահագրգիռ հասարակայնության կարծիքը եւ ազդակիր համայնքի կարծիքներն արտահայտող արձանագրությունը ներկայացնում են լիազոր պետական մարմին:

4. Համայնքի ազդակիր լինելու կամ չլինելու հարցը վերջնականապես որոշում է լիազոր պետական մարմինը` փորձաքննական եզրակացության հիման վրա:

5. Համապատասխան պետական մարմինները փաստաթղթերը ստանալուց հետո 10 օրացուցային օրվա ընթացքում ուղարկում են իրենց կարծիքը լիազոր պետական մարմին:

6. Եթե սույն հոդվածի 2-րդ, 3-րդ եւ 5-րդ կետերի համաձայն շահագրգիռ հասարակության կարծիքը սահմանված ժամկետում չի ներկայացվել լիազոր պետական մարմին, ապա համարվում է, որ փաստաթղթերի վերաբերյալ շահագրգիռ հասարակությունը բացասական կարծիք չի արտահայտել:

Հասարակական լսումներ չկազմակերպելու եւ/կամ դրա արդյունքում արտահայտված կարծիքները կամ արձանագրությունը օրենքով սահմանված կարգով լիազոր մարմնին չուղարկելու դեպքում շահագրգիռ հասարակության եւ/կամ ազդակիր համայնքի կարծիքը համարվում է բացասական:

7. Սույն հոդվածի 1-ին, 1.1-րդ, 2-րդ, 3-րդ, 5-րդ եւ 6-րդ մասերի կիրառումը կարգավորվում է տեղեկատվության ազատության եւ պետական, արտադրական եւ առեւտրական գաղտնիքների վերաբերյալ Հայաստանի Հանրապետության օրենսդրության հաշվառմամբ:

ՕՐԻՆԱԳԾՈՎ ՆԵՐԿԱՅԱՑՎԱԾ ԴՐՈՒՅԹՆԵՐ

ՀՈԴՎԱԾ 8. Oրենքի 9-րդ հոդվածում` 

Հոդված 9.

Փաստաթղթերի փորձաքննության վերաբերյալ մասնագիտական եզրակացության ապահովումը

ԱՌԱՋԱՐԿՈՒԹՅՈՒՆ

Օրենքի նախագծի 8-րդ հոդվածը խմբագրել հետեւյալ կերպ`

1. 4-րդ մասի վերջում լրացնել «Լիազորված անձանց ընտրությունը կատարում է լիազոր մարմինը` ելնելով փորձաքննության` նախատեսվող գործունեության համար անհրաժեշտ ծավալից: Լիազորված անձինք, պետական լիազոր մարմնի իրավասու պաշտոնատար անձանց հետ համապարտ պատասխանատվություն են կրում փորձագիտական սխալ եզրակացության հետեւանքով շրջակա միջավայրին հասցված տնտեսական վնասի համար:

Լիազոր պետական մարմինը իր պաշտոնական կայքում տեղադրում եւ եռամսյակը մեկ անգամ թարմացնում է լիազորված անձանց վերաբերյալ տեղեկատվությունը, որը պետք է ներառի.

ա) անունը, ազգանունը, հայրանունը

բ) կրթության եւ որակավորման մասին տեղեկատվություն

գ) մասնագիտական իրավասության հավաստագրի տրման տարին, ամիսը, ամսաթիվը

դ) հեռախոսահամարը եւ էլեկտրոնային փոստի հասցեն»:

2. 5-րդ  մաuի`

1)  առաջին նախադասության «ստանալուց հետո 70-օրյա ժամկետում» բառերը փոխարինել «ձեռնարկողից ստանալուց հետո սույն օրենքի 6-րդ հոդվածով սահմանված ժամկետներում» բառերով.

2)  երրորդ նախադասության «քան 180 օր» բառերը փոխարինել «քան սույն օրենքի  6-րդ հոդվածի 5-րդ մասով սահմանված ժամկետները, իսկ նախատեսվող գործունեության հնարավոր անդրսահմանային ազդեցության դեպքում` սույն օրենքի 13.2-րդ հոդվածով սահմանված ժամկետներին համապատասխան» բառերով.

3. լրացնել հետեւյալ բովանդակությամբ 5.1-րդ, 5.2-րդ, 5.3-րդ եւ 5.4-րդ մասերով.

«5.1. Մասնագիտական եզրակացության մշակման փուլն սկսվում է սույն օրենքի 8-րդ հոդվածի 1-ին մասով սահմանված ժամկետում լիազոր պետական մարմնի կողմից փաստաթղթերը  լիազորված անձին հանձնելու պահից:

5.2. Լիազոր պետական մարմինը սույն օրենքի 8-րդ հոդվածով սահմանված կարգով  ստացված շահագրգիռ հասարակության կարծիքները 3 աշխատանքային օրվա ընթացքում, անդրսահմանային ազդեցության դեպքում նաեւ անդրսահմանային ազդեցության վերաբերյալ կարծիքները, ինչպես նաեւ առկայության դեպքում անդրսահմանային ազդեցությունների վերաբերյալ խորհրդակցությունների արդյունքները ներկայացնում է լիազորված անձանց, որոնք հաշվի են առնվում մասնագիտական եզրակացությունը կազմելիս, իսկ  կարծիքների բացակայության դեպքում` լիազոր պետական մարմինը կարծիքների համար սահմանված ժամկետի ավարտից հետո 2 աշխատանքային օրվա ընթացքում  դրա մասին տեղեկացնում է  լիազորված անձանց:

Մասնագիտական եզրակացությունը կազմելիս սույն մասով սահմանված` շահագրգիռ հասարակության կարծիքները հաշվի չառնելու դեպքում լիազորված անձն իր կողմից կազմած մասնագիտական եզրակացության հետ միասին լիազոր պետական մարմնին է ներկայացնում նաեւ դրանց չընդունման վերաբերյալ հիմնավորում:

5.3. Լիազորված անձը սույն հոդվածի 5.2-րդ մասով սահմանված կարծիքները լիազոր պետական մարմնից ստանալուց հետո մասնագիտական եզրակացությունը լիազոր պետական մարմին է ներկայացնում` սույն օրենքի 4-րդ հոդվածով սահմանված նախատեսվող գործունեությունների «Ա» կատեգորիայի համար` 10, «Բ» կատեգորիայի համար` 7 օրացուցային օրվա ընթացքում: (Այս կետը առաջարկվում է օրինագծից հանել): 

5.4. Լիազորված անձի հիմնավորման դեպքում լիազոր պետական մարմինը կարող  է երկարաձգել մասնագիտական եզրակացության ներկայացման ժամկետները` սույն օրենքի 4-րդ հոդվածով սահմանված նախատեսվող գործունեությունների «Ա» կատեգորիայի համար` 30,  «Բ» կատեգորիայի համար` 20 օրացուցային օրով, իսկ նախատեսվող գործունեության հնարավոր անդրսահմանային ազդեցության դեպքում` սույն օրենքի 13.2-րդ հոդվածով սահմանված ժամկետներին համապատասխան:».

4. 7-րդ մասի  բ) կետում «կարծիքները» բառից հետո լրացնել «, իսկ նախատեսվող գործունեության հնարավոր անդրսահմանային ազդեցության դեպքում` անդրսահմանային ազդեցության վերաբերյալ կարծիքները եւ անդրսահմանային ազդեցությունների վերաբերյալ խորհրդակցությունների արդյունքները» բառերով:

Օրենքում տեղ գտած մյուս հասկացություններն ու ընթացակարգերը համապատասխանեցնել առաջարկություններով ներկայացված սկզբունքային հարցերի շուրջ արտահայտված իրավական դիրքորոշումներին:

(շարունակելի) 

Արթուր Գրիգորյան, «Էկոդար» ՀԿ