Ամալյա Մարգարյան

Էրեբունի և Նուբարաշեն ընդհանուր իրավասության դատարանում «օֆշորի» գործով դատական նիստի ընթացքում տուժող կողմը հանդես եկավ ճառով: Մինչև գործարար Փայլակ Հայրապետյանի ներկայացուցիչ Աշոտ Գևորգյանը կներկայացներ մեղադրական ելույթը, մեղադրող Դավիթ Վեքիրյանը Աշոտ Սուքիասյանի նկատմամբ քաղհայցի պահանջ ներկայացրեց՝  նշելով, որ ամբաստանյալ Աշոտ Սուքիասյանը խուսափել է հարկերից՝ պետությանը տալով զգալի վնաս: Միջնորդեց Աշոտ Սուքիասյանից պետությանը տված վնասի չվերականգնման համար բռնագանձել 82 մլն 445 հազար դրամ: Աշոտ Սուքիասյանի պաշտապ Յուրի Խաչատրյանը առարկեց և նշեց, որ դատավարության այս փուլում նման հարցերը չեն քննվում:

Փայլակ Հայրապետյանի ներկայացուցիչ Աշոտ Գևորգյանը նշեց, որ համաձայն է այդ մեղադրանքների հետ, և հայտարարեց, որ դրանք մեղադրական դատական ակտ կայացնելու համար բավարար են:

Անդրադառնալով 2009 թ. Էկոնոմիկայի նախարարությունում տեղի ունեցած ադամանդագործության և ոսկերչության զարգացմանն ուղղված խորհրդակցությանը՝ ներկայացուցիչը ասաց.«Աշոտ Սուքիասյանը փորձել է խարդախությամբ գտնել այն մարդկանց շրջանակը, որոնցից կարելի է խաբեությամբ գումարներ հափշտակել: «Ներկայացրել է նախագիծը, հայտնել է, որ Աֆրիկայում ձեռք է բերել ցանքատարածություններ, հանքեր, ունի շուրջ 300 միավոր մեխանիզմներ, մեծ հաջողություններ այդ բնագավառում: Հայտարարել է, որ  50 տոկոս էժան գնով կարող է ադամանդ ներմուծել Հայաստան»,-նշեց ներկայացուցիչը:

Աշոտ Գևորգյանը նշեց նաև, որ Աշոտ Սուքիասյանը խորհրդակցության ընթացքում նշել է, որ իրեն 12 մլն դոլար գումար է անհրաժեշտ ոլորտը զարգացնելու համար, իսկ ծրագրի նպատակն է եղել մոլորության մեջ գցել գործարարներին: «Իմանալով, որ ինքը հանքեր չունի, իմանալով, որ չի կարող նման բիզնեսով զբաղվել, փորձել է մոլորության մեջ գցել ձեռներեցներին: Հետևանքը եղավ այն, որ ոսկերչության և ադամանդագործության ոլորտի ոչ թե զարգացման, այլև տապալման ծրագիր եղավ: Հավատը թաղվեց, Սուքիասյանի գլխավորությամբ դարձավ հուղարկավորության ծրագիր»,-նշեց Փայլակ Հայրապետյանի ներկայացուցիչը, հետո անդրադարձավ վկաների ցուցմունքներին:

Օրինակ՝ Ռուբեն Մկրտչյանի ցուցմունքից ընթերցեց, որտեղ ասվում էր՝ Աշոտ Սուքիասյանը Աֆրիկայում հանքատարածություններ չունի:  Անդրադարձավ նաև Աշոտ Սուքիասյանի ցուցմունքին, և նշեց. «Տ. Սարգսյանի և Ն. Կճոյանի ստորագրությունները կրկնօրինակող սարքի միջոցով ինքը կեղծել է, իսկ  «Ամերիաբանկից» 6 մլն դոլար փոխանցվել է Կիպրոս այն դեպքում, երբ նշված է, որ փոխանցումը պետք է կատարվեր տեխնիկա ձեռք բերելու համար»,-հայտնեց ներկայացուցիչը: Աշոտ Գևորգյանը նշեց նաև, որ խուզարկությամբ քննիչի կողմից հայտնաբերվել է «Ամերիաբանկի` Արտակ  Հանեսյանի կողմից հասցեագրված չստորագրված գրություն, որով Սուքիասյանը փորձել է շփոթության մեջ գցել, իբր Հանեսյանը ինչ-որ գրություններ է պատրաստել»:

Փայլակ Հայրապետյանի ներկայացուցիչ Աշոտ Գևորգյանը Աշոտ Սուքիասյանի նկատմամբ պահանջեց երկարաժամկետ ազատազրկում և պահանջեց բռնագանձել 8 մլրդ դրամ՝ հօգուտ Փայլակ Հայրապետյանի:

Փայլակ Հայրապետյանի մյուս ներկայացուցիչ Լուսինե Աղլամազյանը ևս նշեց, որ Աշոտ Սուքիասյանի նկատմամբ պետք է կիրառվի երկարաժամկետ ազատազրկում՝ նշելով, որ Աշոտ Սուքիասյանի կատարած գործողությունների արդյունքում Փայլակ Հայրապետյանը ունեզրկվել է:

Աշոտ Սուքիասյանը դատարանին ներկայացրեց նաև իր տեսակցությունների արգելքը վերացնելու մասին միջնորդություն, որը դատավոր Վարդան Գրիգորյանը բավարերեց:

Հաջորդ նիստին պաշտպանական կողմը հանդես կգա ելույթով, նիստը կկայանա հուլիսի 21-ին:

Նիստի ավարտից հետո Փայլակ Հայրապետյանը լրագրողների հետ զրույցում նշեց, որ Աշոտ Սուքիասյանից պահանջում է իր ամբողջ ունեցվածքը: