Բանկերի միության նախագահ Աշոտ Օսիպյանն այսօր Զարգացման հայկական գործակալությունում  հանդիպել  է Հոնկոնգի գործարար և ընկերությունների համաշխարհային խմբի  (The Global Group companies) նախագահ Ջոնի Հոնի գլխավորած պատվիրակությանը:

Դեկտեմբերի 15-17-ը Հայաստանում գտնվող  պատվիրակության կազմում են նաև  Մեծ Բրիտանիայի Լորդերի պալատի անդամ բարոնուհի Քերոլայն Քոքսը և Ընկերությունների համաշխարհային խմբի փոխնախագահ Քիթ Բենեթը: Հանդիպման ընթացքում կողմերը անդրադարձել են հայաստանյան բանկային համակարգի ներդրումային հնարավորություններին:

Մասնավորապես, քննարկվել է Հայաստանի բանկային համակարգի ներկա իրավիճակը, զարգացման ուղիները և հայկական բանկերի կապիտալի մեծացման նպատակով  Հոնկոնգի ֆոնդային բորսայում IPO անցկացնելու  հնարավորությունը: Այս մասին հայտնում է ՀԲՄ մամլո ծառայությունը: