«Նաիրիտ» գործարան»-ի տարածքում բռնկված հրդեհը ժամը 14:00-ի սահմաններում մեկուսացվել է: Արտակարգ իրավիճակների նախարարությունը հայտնում է, որ կրակի տարածման վտանգ չկա. այրվող նյութը վտանգ չի ներկայացնում: 

Հրդեհի բարդության «թիվ 3» կանչով դեպքի վայր են մեկնել տասներկու մարտական հաշվարկ և Ճգնաժամային կառավարման կենտրոնի արտակարգ իրավիճակների արձագանքման և օպերատիվ խմբերը:

ԱԻՆ-ն խոստանում է լրացուցիչ տեղեկատվություն տրամադրել ավելի ուշ: 

Հիշեցնենք, որ գործարանից այսօր պայթյունի ձայն է լսվել, որից հետո հրդեհ է բռնկվել: «Հետքի» տեղեկություններով, հրդեհը բռնկվել էր 2-11 արտադրամասում, որտեղ պահեստավորված է լաքեթինոլ նյութը: