«Փայլակ Հայրապետյանը, կորցնելով իր գույքը, բազմաթիվ դատեր տանուլ տալով «Ամերիաբանկին», կարող էր տեսնել միայն մի ելք՝ Աշոտ Սուքիասյանին մեղադրելով հասնել նրա դատապարտմանը, որից հետո խարդախությամբ, լիազորագիր վերցնելու հիմքով, կիպրոսյան և աֆրիկյան ընկերություններից արդեն ձեռք բերված դատավճռով, պահանջել Ա. Սուքիասյանի կատարած ներդրումները և բաժնեմասերը»,-Էրեբունի և Նուբարաշեն ընդհանուր իրավասության դատարանում «Օֆշորի գործով» նիստին Սուքիասյանի պաշտպան Յուրիկ Խաչատրյանը հանդես եկավ ճառով, այնուհետև ավելացրեց, որ սրանով Փայլակ Հայրապետյանը կտիրանա Աշոտ Սուքիասյանի գույքին, իսկ իր պաշտպանյալը կհայտնվի ճաղերի հետևում:

Փաստաբանը հավելեց նաև, որ այս ամենին տրվել է քաղաքական աստառ՝ ուշադրության կենտրոնում պահելու համար: «Այդ սցենարին հասնելու համար պետք է քաղաքական երանգ տալ, լրատվամիջոցներով աղմուկ բարձրացնել՝ ճանաչված անձանց անուններն անընդհատ շրջանառության մեջ պահել, որպեսզի լրատվության միջոցների համար հետաքրքիր լինի: Սակայն, Փայլակ Հայրապետյանը լրատվամիջոցներին, երկրի նախագահին, վարչապետին բողոքելիս չի ասել իր գույքային վիճակի մասին, չի ասել, որ գործարք կատարելիս խախտել է Քաղաքացիական օրենսդրության պահանջները, պայմանագիր չի կնքել, որի արդյունքում էլ տեղի է ունեցել եղածը»,-ասաց Յուրիկ Խաչատրյանը:

Պաշտպանը նշեց, որ առաջադրված մեղադրանքն ապացուցված չէ, զուրկ է ապացուցողական հիմքերից. «Անօրինական կարգով իմ պաշտպանյալին տրամադրվել է քրեաիրավական գնահատական, այն դեպքում, երբ կողմերի մեջ վեճ լինելու դեպքում կիրառվում են քաղաքացիական դատավարության օրենսգրքով նախատեսված դրույթներ»,-դատարանի դահլիճում հայտնեց փաստաբանը: Նա անդրադարձավ 2009-ին էկոնոմիկայի նախարարությունում տեղի ունեցած ադամանդագործության և ոսկերչության խնդիրներին նվիրված քննարկման ժամանակ Աշոտ Սուքիասյանի ներկայությանը և նշեց, որ վերջինս նախաձեռնող չի եղել և չի իմացել՝ ովքեր են ներկա լիենլու ժողովին: «Իմ պաշտպանյալը նպատակ չի ունեցել տիրանալ Փայլակ Հայրապետյանի ունեցվածքին»,-հավելեց փաստաբանը:

Փաստաբանը ներկայացրեց փաստաթղթեր, ըստ որի՝ երևում էին Աշոտ Սուքիասյանի կատարած գործարքները Սիերա Լեոնեում՝ ձեռք բերած սարքավորումներ, հողի նմուշ:

«Այս գործարքներով Աշոտ Սուքիասյանի գործարարության փաստը հիմնավորվում է: Աշոտ Սուքիասյանը ոչ թե իրեն դրել էր ադամանդագործության մեջ կայացած գործարարի տեղ, այլ ինքն այդ ոլորտում մասնագետ էր»,-նշեց փաստաբանը, ապա ավելացրեց, որ վերոնշյալ քննարկմանը Փայլակ Հայրապետյանը ներկայացել է սեփական նախաձեռնությամբ:

Փաստաբանը տեղեկացրեց նաև, որ Աշոտ Սուքիասյանը մինչև  էկոնոմիկայի նախարարությունում կայացած ժողովն ունեցել է անշարժ գույք, որը լիկվիդացիոն գներով անցել է բանկին, և Սուքիասյանը կորցրել է ամեն ինչ: Իսկ Փայլակ Հայրապետյանը, դիմելով Կենտրոն և Նորք-Մարաշ ընդհանուր իրավասության դատարան, Ա. Սուքիասյանին սնանկ է ճանաչել:

Յուրիկ Խաչատրյանը նշեց նաև, որ «Ամերիաբանկի» տրամադրած վարկը հատկացվել է մաս-մաս, որը նույնպես չի նպաստել բիզնեսի զարգացմանը:

Դատարանի վերաբերյալ Յուրիկ Խաչատրյանը նշեց, որ օբյեկտիվ քննություն չի իրականացրել. վկաներ կանչելու իրենց միջնորդությունները դատարանը մերժել է. «Երեքը մեկի դեմ են դուրս եկել»,-նշեց փաստաբանը, հետո հիշեց Հակոբ Պարոնյանին և մեջբերեց. «Երկու տարվա ժողովին մեջ բան մը չըրին, պաշտպանական կողմի համար դահլիճի տաքության ու սառնության հարցը քննարկելուց բացի, ոչ մի օգուտ չեղավ»:

Փաստաբանը նշեց, որ փողերի լվացում չի կատարվել, ավելացրեց, որ ամբաստանյալի գործողությունների մեջ չկա նաև խարդախության հանցակազմ: Փաստաբանը մանրամասն ներկայացրեց, թե փողերի լվացումը և խարդախությունը ո՞ր օրենքներով, Վճռաբեկ դատարանի ո՞ր որոշումներով են սահմանվում՝ պնդելով, որ դրանք առկա չեն իր պաշտպանյալի կատարած գործողություններում:

Հիշեցնենք, որ ամբաստանյալ Աշոտ Սուքիասյանի նկատմամբ մեղադրանք է առաջադրվել խարդախությամբ ուրիշի առանձնապես խոշոր չափերով գույքի նկատմամբ իրավունք ձեռք բերելու, հանցավոր ճանապարհով ստացված խոշոր չափերով եկամուտները օրինականացնելու, չարամտորեն խոշոր չափերով հարկեր, տուրքեր և պարտադիր այլ վճարումներ կատարելուց խուսափելու համար: Նրա նկատմամբ մեղադրանք է առաջադրվել Քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում, 178-րդ հոդվածի 3-րդ մասի 1-ին կետով՝ առանձնապես խոշոր չափով խարդախություն կատարելը, 205-րդ հոդվածի 2-րդ մասով՝ հարկերից, տուրքերից կամ պարտադիր այլ վճարումները վճարելուց չարամտորեն խուսափելը:

Պաշտպան Յուրիկ Խաչատրյանը դատարանին խնդրեց իր պաշտպանյալի նկատմամբ սույն քրեական գործը կարճել: «Պետությունը պարտավոր չէր գործող քաղաքացիական օրենսդրության պահանջների անտեսմամբ և գործարքներ կնքած տուժող ճանաչված Փ. Հայրապետյանի և մյուսների գույքային և այլ իրավունքների վերականգնումը դիտել հանրային շահի տիրույթում և իրականացնել մասնավոր շահերի քրեաիրավական պաշտպանություն»,-հավելեց փաստաբանը:

Շուրջ հինգ ժամ տևած դատական նիստը հետաձգվեց:

Հաջորդ նիստին ամբաստանյալը հանդես կգա ճառով: Նիստը կկայանա սեպտեմբերի 15-ին ժամը 14-ին: