Սարո Բաղդասարյան, Ամալյա Մարգարյան

Վերջին  օրերին  հասարակությանը հուզող գլխավոր թեման առաջին անհրաժեշտության սննդամթերքի թանկացումն է։ Տավարի, խոզի, ոչխարի մսի շուկայում նկատվում է 20-30% գնաճ։ Ըստ Տնտեսական մրցակցության պաշտպանության պետական հանձնաժողովի կատարած ուսումնասիրությունների՝ նորզելանդական կարագի գինը 1 տարվա կտրվածքով աճել է 38%-ով. 2016-ի օգոստոս-սեպտեմբեր ամիսներին եղել է 2779 դրամ, իսկ 2017-ի օգոստոս-սեպտեմբերին կազմել է 3842 դրամ։ Պատճառը միջազգային շուկայական գների տատանումներն են։

Երևանի խանութների մսավաճառները պնդում  են, որ մսի գնի բարձրացումները կապված են ապրանքի արտահանման հետ։ Իսկ «Հետք»-ի հետ զրույցում Երևանի բնակիչները դժգոհում են թանկացումներից՝ շեշտելով, որ ստացած աշխատավարձն ու թոշակը չի բավարարում առաջին անհրաժեշտության ապրանքների գնման համար:

Հոկտեմբերի 4-ին ԱԺ-Կառավարություն հարց ու պատասխանի ժամանակ գյուղատնտեսության նախարար Իգնատի Առաքելյանը լրագրողների հետ զրույցում ասաց, թե թանկացումները կարող են պայմանավորված լինել պահանջարկով։