Տեսանյութեր
Լուսանկարներ
Ս.Սարգսյան. «Մեր սփյուռքահայ քույրերի և եղբայրների մեծ մասը թյուր կարծիք ունի, որ չի կարելի հայրենիքում բիզնես ունենալ»
Նախագահ Սերժ Սարգսյանն այսօր ընդունել է Երևանում ապրիլի 29-30-ը անցկացվող Հայ առևտրաարդյունաբերական պալատների և գործարարների միությունների ներկայացուցիչների խորհրդաժողովի մասնակիցներին:
Նախագահը ողջունել է խորհրդաժողովին մասնակցելու նպատակով աշխարհի տարբեր երկրներից Հայաստան ժամանած հայրենակիցներին և նշել, որ բացի ճանաչողական այցերից' յուրաքանչյուր հայից ակնկալվում է նաև գործնականում մասնակցել մեր պետության զարգացման ընթացքին:
«Ցավոք, մեր սփյուռքահայ քույրերի և եղբայրների մեծ մասը թյուր կարծիք ունի, որ չի կարելի հայրենիքում բիզնես ունենալ, դրամ վաստակել: Սա շատ սխալ մոտեցում է, որովհետև հայրենիքում գործարարությամբ զբաղվելը, դրամ վաստակելը ամենագործուն մասնակցությունն է Հայաստանի զարգացմանը, որովհետև հայրենիքում վաստակած յուրաքանչյուր դրամից որոշակի հարկեր եք վճարում, աշխատատեղ, համախառն ներքին արդյունք եք ապահովում և այլն»,- ասել է Սերժ Սարգսյանը:
Նա կոչ է արել հանդիպման մասնակիցներին և ի դեմս նրանց' սփյուռքահայ բոլոր գործարարներին, մասնակցել Հայաստանի տնտեսական հզորացմանը:
Սերժ Սարգսյանը ողջունել է ՀՀ սփյուռքի նախարարության, Հայ-կանադական գործարար խորհրդի և Հայաստանի առևտրաարդյունաբերական պալատի համատեղ նախաձեռնությունը՝ ստեղծել «Հայկական առևտրական ցանց» ընկերակցություն:
Նախագահի մամուլի գրասենյակի տեղեկացմամբ' հանդիպման մասնակիցները ևս կարևորել են «Հայկական առևտրական ցանցի» ստեղծման նախաձեռնությունը և նշել, որ այն կարող է ոչ միայն հայրենիքի, այլև սփյուռքի գործարար միավորումների միջև ապահովել արդյունավետ կապ ու համագործակցություն:
Մեկնաբանություններ (3)
Մեկնաբանել