Ծառայությունների ոլորտը քչերից է, որը կարողացել է 2017թ.-ի հունվար-օգոստոսին աճ գրանցել՝ 2016թ.-ի նույն ժամանակաշրջանի համեմատությամբ։

Ոլորտի աճը եղել է 12 %, իսկ ընդհանուր շրջանառության գումարը` ավելի քան 904 միլիարդ դրամ:

Պաշտոնական վիճակագրությամբ՝ ծավալային աճ գրանցվել է ոլորտի բոլոր ենթակառուցվածքներում: Սակայն ամենամեծ աճն ապահովել է ֆինանսական և ապահովագրական գործունեության ոլորտը՝ նախորդ տարվա հունվար-օգոստոս ամիսների համեմատությամբ  20% ավելի շրջանառությամբ:

Այս ոլորտին է բաժին ընկել ծառայությունների ոլորտի շրջանառության ամենամեծ՝ 20 % ծավալը, որը կազվել է 196 միլիարդ դրամ:

173 միլիարդ դրամ շրջանառություն էլ ապահովել է մշակույթի, զվարճությունների և հանգստի ոլորտը, որը կազմել է ընդհանուրի 19%-ը: Սա ծառայությունների ոլորտի երկրորդ՝ ամենաակտիվ ենթատեսակն է:

Գծապատկերում առանձնացրել ենք այն չորս ենթակառուցվածքները, որոնք կարողացել են ոլորտում 10%-ից ավելի շրջանառություն ապահովել:

Ինչպես երևում է գծապատկերից՝ զգալի շրջանառություն են ապահովել նաև տեղեկատվության և կապի, տրանսպորտային ծառայությունները:

Եթե դիտարկենք ծառայությունների ոլորտի ընդհանուր շրջանառությունն առանձնացված՝ ըստ 2017-ի հունվար-օգոստոս ամիսների, ապա պետք է նշել, որ ոլորտում, 2016-ի համեմատությամբ, աճ է գրանցվել բոլոր ամիսներին: Իսկ օգոստոսը կարողացել է ապահովել ոլորտի համար նկատելի շրջանառություն՝ 129 միլիարդ դրամի չափով:

Հուլիսին էլ, նախորդ տարվա նույն ամիսների համեմատությամբ, ամենաշատը` 17%, աճն է գրանցել: Ընդհանրապես, ծառայությունների ոլորտի համար ամռան ամիսներն ավելի բարենպաստ են եղել. այդ ամիսներին ոլորտի շրջանառությունը շարունակաբար աճել է։

Լուսանկարը՝ pinterest.com-ի