«Գլոբալ էկոլոգիական հիմնադրամի» (GEF) հետ համագործակցության հանձնաժողովի ընդլայնված նիստը նվիրված  էր  ՀՀ բնապահպանության նախարարության կողմից «Գլոբալ էկոլոգիական հիմնադրամ»  ներկայացված «Ազգային փաթեթի» ծրագրային առաջարկությունների կատարման ապահովմանը և «2007-2011 թթ. նախարարական զեկույցի» ներկայացմանը:  Նիստին հրավիրված էին ՀՀ վարչապետի 6 մայիսի 2010 թ.N 322-Ն  որոշմամբ ստեղծված «Գլոբալ էկոլոգիական հիմնադրամի» հետ համագործակցության հանձնաժողովի անդամները, բնապահպանության նախարարության աշխատակիցներ, բնապահպանական հասարակական կազմակերպությունների և լրատվության ներկայացուցիչներ: Նիստը վարում էր բնապահպանության նախարար Ա. Հարությունյանը, որը միաժամանակ նաև ԳԷՀ-ի պատասխանատու անձն է:

Նիստին ներկա էին նաև ԳԷՀ-ի ծրագրեր իրականացնող Հայաստանի Հանրապետությունում ներկայացված միջազգային կազմակերպությունների  ներկայացուցիչներ:

Բացման  խոսքով հանդես եկավ բնապահպանության նախարար  պարոն  Ա. Հարությունյանը: Նախարարը նշեց, որ վերջին տարիներին ակտիվացել է համագործակցությունը ԳԷՀ-ի հետ: Եթե անցած 20 տարիների ընթացքում ԳԷՀ-ից ստացվել է շուրջ 22 մլն դոլարի ծրագիր, ապա միայն «ԳԷՀ-5»-ի շրջանակներում, առաջիկա 4 տարիների համար  նախատեսվում է ստանալ շուրջ 15 մլն դոլարի դրամաշնորհային ֆինանսավորում:

ԳԷՀ-ի ծրագրային փաթեթի ներկայացումը վեր հանեց նաև հայաստանյան առաջիկա զարգացումները` ներդրումային առումով:

Երկրորդ հարցը վերաբերում էր 2007-2011 թթ. նախարարական զեկույցին:

Զեկույցը նախարարի և նիստի մասնակիցների կողմից որակվեց որպես «ամփոփ հաշվետվություն», քանզի ներկայացնում, գնահատում ու արժևորում է անցած 5 տարիների բնապահպանական գործընթացներն ու ձեռքբերումները, բացում համագործակցության նոր հեռանկարներ:

Բնապահպանության նախարարություն