ՀՀ ոստիկանության կազմակերպված հանցավորության դեմ պայքարի գլխավոր վարչության ծառայողները վնասազերծել են հանցավոր խմբի, որի կազմում եղել են ՀՀ կրթության նախարարության աշխատակից, դասախոս, դպրոցի տնօրեն, այլ անձինք:

Հանցավոր խմբի անդամ Համբարձում Ավոյանը, 2009 թ. աշխատելով ՀՀ կրթության և գիտության նախարարության հանրակրթության տեսչավորման բաժնի պետի տեղակալ, Երևանի ուկրաինական համալսարանի դասախոս Ռաֆիկ Մխիթարյանի և նախկինում մի քանի անգամ դատապարտված Սամվել Հովհաննիսյանի հետ պատրաստել և Էդգար Հարությունյանի միջոցով 3500 դոլարով Էդվարդ Եղնանյանին է վաճառել Երևանի պետական համալսարանի տնտեսագիտության ֆակուլտետի պետական նմուշի կեղծ դիպլոմ:

Գործարքը կայացել է Հարությունյանի ընկերոջ' Սարգիս Չիչյանի տանը: Ներկա եղել և բաժին է ստացել նաև Սարգիսի հայրը' Վաղարշակ Չիչյանը:

Ավոյանն ու Մխիթարյանը նույնատիպ դիպլոմ են պատրաստել նաև Վաղարշակ Չիչյանի որդի Սարգիս Չիչյանի համար:

Ավոյանն ու Հովհաննիսյանը պատրաստել և մի քաղաքացու 300 դոլարով վաճառել են Երևանի Թերլեմեզյանի անվան գեղարվեստի պետական ուսումնարանի կեղծ դիպլոմ:

Ավոյանի աշխատասենյակում հայտնաբերվել է ութամյա կրթության չորս լրացված վկայական, որոնք վերցրել էր Արմավիրի N4 միջնակարգ դպրոցի տնօրեն Սաշիկ Վարդանյանից' միջուկները փոխելու և Հովհաննիսյանի միջոցով վաճառելու մտադրությամբ:

Դրանց հիման վրա էքստերն քննություն հանձնելու և ատեստատ տրամադրելու համար Վարդանյանը կաշառք է վերցրել վկայականներում անվանագրված աշակերտների ծնողներից:

Հայտնաբերվել են նաև կեղծ կնիքներ, որոնք առգրավվել են նշված կեղծ փաստաթղթերի հետ: ՀՀ ոստիկանությունը հայտնում է, որ նախապատրաստված նյութերն ուղարկվել են քննչական գլխավոր վարչություն: