Հայաստանի ամբողջ բնակարանային ֆոնդի  27%-ը կենտրոնացված է Երևանում։ Այսօրվա դրությամբ հանրապետության բնակֆոնդի ընդհանուր մակերեսը 93.8 միլիոն քառակուսի մետր է, որից միայն Երևանում՝ մոտ 25.7 միլիոն քառակուսի մետրն է։ Բնակարանային ֆոնդը ներառում է բնակարանները, տները, ինչպես նաև՝ հանրակացարաններն ու ժամանակավոր բնակելի տարածքները։ Տվյալները հրապարակում է Ազգային վիճակագրական ծառայությունը։

• Քանի տուն ու բնակարան կա Հայաստանում. բնակֆոնդը տասը տարում 23%-ով ընդլայնվել է

Բնակարանային ֆոնդի մակերեսով Երևանին հաջորդում են Կոտայքը, Լոռին, Արարատն ու Արմավիրը։ Իսկ ամենափոքր կշիռը Վայոց ձորինն է։

Ինչպես վկայում են վիճծառայության տվյալները, վերջին տասը տարում մայրաքաղաքի բնակարանային ֆոնդն ընդլայնվել է մոտ 4.9 մլն քմ-ով կամ ավելի քան 23%-ով։

Այսօրվա դրությամբ Երևանում կա 4 824 բազմաբնակարան շենք, որոնց բնակարանների քանակը կազմում է  232 075։  Շենքերի ընդհանուր մակերեսը 15.2 մլն քմ է, դա հանարապետության բազմաբնակարան շենքերի ընդհանուր մակերեսի շուրջ 54%-ն է։ Իսկ եթե բնակարանների թվով ենք որոշում Երևանի կշիռը, ապա այդ պարագայում ևս մայրաքաղաքին բաժին է ընկնում հանրապետության բնակարանների ընդհանուր թվի կեսից ավելին։

Ավելացել են պանելային և մոնոլիտային արտաքին պատերով շենքերը

Վերջին տասը տարում Երևանի բնակարանային ֆոնդի բազմաբնակարան շենքերի քանակն ավելացել է 156-ով։ Ընդ որում՝ քարե արտաքին պատերով շենքերի քանակը 2-ով պակասել է, փոխարենը 95-ով ավելացել է  պանելային պատերով շենքերի թիվը, 63-ով՝ մոնոլիտային շենքերի թիվը։

Ընդհանուր առմամբ, այսօր մայրաքաղաքում շենքերի ավելի քան 48%-ը քարե արտաքին պատերով են, մոտ 50%-ը՝ պանելային, մոտ 2%-ն էլ՝ մոնոլիտային։

Հաջորդ միտումը, որը գրանցվել է Երևանի բնակարանային ֆոնդում վերջին տարիներին, բազմաբնակարան բարձրահարկ շենքերի թվի ավելացումն է։ Այսպես, եթե 10 տարի առաջ Երևանի բնակֆոնդում 9 և ավելի հարկանի շենքերի քանակը կազմում էր 1906, ապա այսօրվա դրությամբ դրանց քանակը 2 071 է։ 

Իսկ մարզերում բազմաբնակարան շենքերի ֆոնդը համեմատաբար փոքր փոփոխությունների է ենթարկվել։

Տների պատկերը

Առանձնատների քանակով ևս Երևանը գերազանցում է մարզերին։ Հանրապետությունում այսօրվա դրությամբ 393 560 առանձնատուն կա, որից 59 557-ը՝ միայն  Երևանում են։ Տասը տարում տների թիվը մայրաքաղաքում 20 հազարով ավելացել է: