Խորհրդարանն առաջին ընթերցմամբ ընդունեց «Պաշտպանության մասին» օրենքի նախագիծը։

Քվեարկությունից առաջ վարման կարգով ձայն խնդրեց «Ելք» խմբակցության ղեկավար Նիկոլ Փաշինյանը՝ հայտնելով, որ  դեմ են քվեակելու օրենքի նախագծին: «Խնդիր ունենք այն փիլիսոփայության հետ, որը դրված է  ԶՈՒ ԳՇ-ի ձևավորման հիմքում, նաև բավարար չենք համարում ռազմաարդյունաբերական համալիրի զարգացման տեմպերը, և մեր առաջարկը, որ պետք է նպաստեր զարգացմանը, չի ընդունվել»,- ասաց նա:

Հիշեցնենք, որ «Ելք»-ն առաջարկում էր օրենքով ամրագրել, որ  ԶՈՒ գնումները տեղական արտադրողներից  յուրաքանչյուր տարի ավելանան նախորդ տարվա փաստացի կատարված ռազմական բյուջեի գնումների առնվազն 2 տոկոսի չափով, ինչը, սակայն, պաշտպանության նախարարը որակեց ոչ նպատակահարմար։

Նախագիծն ընդունվեց 86 կողմ և  9 դեմ ձայների հարաբերակցությամբ:

Օրենքի նախագծի մեջ նշվում է, որ  այն կարգավորում է Հայաստանի Հանրապետության պաշտպանության կազմակերպման իրավական հիմքերը, պաշտպանության ոլորտում պետական և տարածքային կառավարման, տեղական ինքնակառավարման մարմինների, պաշտոնատար անձանց, անկախ կազմակերպական իրավական ձևից կազմակերպությունների, զինված ուժերի և այլ զորքերի գործունեությունը, Հայաստանի Հանրապետության պաշտպանությանը մասնակցելու գործընթացում քաղաքացիների իրավունքները և պարտականությունները, ինչպես նաև զորահավաքային նախապատրաստության և զորահավաքի անցկացման հետ կապված հարաբերությունները:

Մի շարք այլ նախագծեր ևս քվեարկվեցին։ 91 կողմ ձայներով երկրորդ ընթերցմամբ և ամբողջությամբ ընդունվեց «Դատական ակտերի հարկադիր կատարման մասին» ՀՀ  օրենքում և կից ներկայացված փաթեթում փոփոխություն կատարելու հարցը:

Երկրորդ ընթերցմամբ և ամբողջությամբ ընդունվեց  «Մարդու իմունային անբավարարության վիրուսից առաջացած հիվանդության կանխարգելման մասին» ՀՀ օրենքում փոփոխություններ կատարելու նախագիծը:

«Պետական տուրքի մասին» օրենքի քվեարկությունից առաջ վարման կարգով խոսեց «Ելք» խմբակցության պատգամավոր Արտակ Զեյնալյանը՝ ասելով, որ խմբակցությունը դեմ է քվեարկելու նախագծին, քանի որ ըստ նրա՝ վարձավճարներ և տուրքեր կարող են վճարվել միայն օրենքով, և ԱԺ-ն չի կարող այն վերապահել կառավարությանը: Նախագիծը երկրորդ ընթերցմամբ և ամբողջությամբ ընդունվեց 61 կողմ, 11 դեմ և 20 ձեռնպահ ձայների հարաբերակցությամբ։

 «Հավաքների ազատության մասին» օրենքի նախագիծն ամբողջությամբ  ընդունվեց միաձայն՝ 94 կողմ ձայներով։